Ո՞րն է ամենաերկար օձը

Տարբեր ժամանակներում ճանապարհորդները պատմել են, որ իրենց աչքով տեսել կամ ականտեսներից լսել են 30-40-մետրանոց օձերի մասին, որոնք ապրում են Ամազոնում։ Սակայն ընդունվել է, որ ամենաերկար օձը հսկա անակոնդան է, որը չափվել է Կոլումբիայի ջունգլիներում նավթ փնտրող մի կոլումբիացի երկրաբանի կողմից 1944թ.։ Ըստ նրա խոսքերի, օձի երկարությունը եղել է 11 մետր 43 սանտիմետր։ Այդ օձին այդպես էլ «պահել» չհաջողվեց։ Գլխին հարված ստանալուց, գիտակցությունը կորցնելուց հետո չափվելով, նա կրկին գիտակցության է վերադարձել ու սողալով հեռացել։ Այսպիսով, նրան այլևս ոչ ոք չի տեսել։ Այնուամենայնիվ, այդ արդյունքը գրանցված է Գինեսի ռեկորդների գրքում։
Անակոնդա

Նյու-Յորքի կենդանաբանական ընկերությունը դեռևս 20-րդ դարի 30-ականներին 1000 ԱՄՆ դոլլարի չափով պարգևատրում խոստացավ այն մարդուն, ով փաստացիորն կհաստատի 12,2 մետրից ավել երկարություն ունեցող անակոնդայի գոյությունը։ Պարգևը այդպես էլ ոչ ոք չստացավ։ Ավելի ուշ, ԱՄՆ նախկին նախագահ Թեոդոր Ռուզվելտը պարգևի չափը հասցրեց մինչև 6000 ԱՄՆ դոլլար, իսկ փնտրվող օձի երկարությունը նվազեցրեց մինչև 9,12 մետր։ Ներկայումս պարգևավճարի չափը կազմում է 50000 ԱՄՆ դոլլար, իսկ փնտրվող օձը պետք է ունենա 10 մետր երկարություն։

Հսկա (կանաչ) անակոնդայի միջին երկարությունը կազմում է 5-6 մետր, որոշները կարող են ունենալ մինչև 8-9 մետր երկարություն։

Ներկայումս երկրի վրա ամենաերկար օձը համարվում է Ասիայում բնակվող ցանցավոր պիթոնը։
ցանցավոր պիթոն

Ոչ ստույգ աղբյուրներից, 80-ական թթ. ճապոնական գազանանոցներից մեկում բնակվող պիթոնն ունեցել է 12 մետր 20 սանտիմետր երկարություն։ Սակայն պաշտոնապես Գինեսի ռեկորդների գրքում գրանցված ամենաերկար պիթոնը 1912թ. Ինդոնեզիայի Սուլավեսի կղզում բռնված սողունն է։ Նրա երկարությունը կազմել է 9 մետր 75 սանտիմետր։ Անազատության մեջ ապրող ամենաերկար պիթոնը Սամանտա անունով էգ օձն է, որն ունեցել է 7,5 մետր երկարություն։ Նրան բռնել են Բորնեո կղզու վրա։ Այն սատկել էլ 2002թ. Բրոնքսի գազանանոցում (Նյու-Յորք)։ Նրա մահից հետո ռեկորդակրի դափնեպսակները փոխանցվել են Ֆլաֆֆի պիթոնին, որին խնամում էր սողունների գիտակ Բոբ Կլարկը։ Այս պիթոնը բնակվում էր ԱՄՆ-ի Օհայո նահանգի Կոլումբուս կենդանաբանական այգում։ Նրա երկարությունը կազմում էր 7,3 մետր, իսկ քաշը՝ մոտ 135կգ։ Ֆլաֆֆին սատկել է 2010թ՝ 18 տարեկանում։
Ֆլաֆֆի

Ցանցավոր պիթոնների միջին երկարությունը համարվում է 4-8 մետրը։
Այսպիսով, անակոնդան ու ցանցավոր պիթոնները առ այսօր պայքարում են երկրագնդի ամենաերկար օձի տիտղոսի համար։
Երկրի վրա ապրող ամենախոշոր օձերը թունավոր չեն։ Իրենց որսը նրանք սպանում են խեղդելու միջոցով՝ օղաձև փաթաթվելով նրան։
Արկածային պատմվածքներում հաճախ են պատմվում խուլ ջունգլիներում բնակվող հսկայական օձերի մասին, որոնք հարձակվում են մարդկանց վրա և ուտում նրանց։ Սակայն անակոնդաները մեծ մարդկանց համար վտանգավոր չեն։ Մարդկանց վրա հարձակումները հատուկենտ են և հիմնականում պայմանավորված են նրանով, որ անակոնդան իր ուժերը գերագնահատել է, կամ թերագնահատել մարդու չափսերը՝ ջրի տակից տեսնելով միայն մարդու մարմնի մի մասը։ Դեռևս ոչ մի մասնագետ չի տեսել այնպիսի դեպք, երբ անակոնդան կկարողանա կուլ տալ 60կգ ավել քաշ ունեցող որսը։ Սակայն, նման օձերը կարող են վտանգ ներկայացնել երեխաների ու պատանիների համար։ Հայտնի են երեխաների վրա ցանցավոր պիթոնների հարձակման դեպքեր՝ մահացու ավարտով։ Ու չնայած իրենց հսկայական չափսերին ու ագրեսիային, ցանցավոր պիթոնները շատ հաճախ տեռարիումներին ցանկալի բնակիչներ են։

Անակոնդաների մարդկանց վրա հարձակման դեպքերը ևս հատուկենտ են։
Հարկ է նկատել, որ հսկայական օձերը մարդուց ավելի շատ են տուժում, քան մարդիկ օձերի պատճառով։ Առաջին հերթին շատ երկրներում օձերը հանդիսանում են որպես ուտելիք։ Դրանց կաշին օգտագործվում է նաև կոշիկների, պայուսակների և այլ կաշվե իրերի պատրաստման նպատակով։

անակոնդայի որս

Աշխարհի շատ գազանանոցներում ապրում են բազմաթիվ հսկա օձեր, և որպես կանոն, նրանք բացարձակապես ագրեսիա չեն դրսևորում։ Ազատության մեջ ապրող 6մ և ավելի երկարություն ունեցող պիթոնները մարդու համար կարող են վտանգավոր լինել։ Երբ նրանց վրա հարձակվում են և ուզում են բռնել, պաշտպանության նպատակով պիթոնները փորձում են կծել և ոչ թե իրենց օղակների մեջ առնել հակառակորդին։ Նրանք այդպես են վարվում միայն իրենց որսի հետ։
Երկրի վրա ապրող ամենամեծ թունավոր օձը թագավորական կոբրան է, որն ապրում է Հարավ-Արևմտյան Ասիայում և Հնդկաստանում։ Թագավորական կոբրաների ամենաերկար ներկայացուցիչներն ունեն մինչև 5,5 մետր երկարություն։ Նրանց միջին երկարությունը կազմում է 3-4 մետր։
թագավորական կոբրա

Ի դեպ…
Օձին չափելը այնքան էլ հեշտ զբաղմունք չէ։ Իհարկե, ամենաճիշտ արդյունքը կստացվի այն դեպքում, եթե օձը ամբողջ երկարությամբ մեկնվի։ Սակայն խոշոր օձերի համար նման դիրքը անբնական է։ Իսկ սատկած օձերի դեպքում նրանց մարմինը քարանում է այնպես, որ չափումն ավելի է դժվարանում։ Ինչ վերաբերում է փոխած կաշու միջոցով օձի երկարությանը չափելուն, ապա այդ կաշին կարող է մինչև 20% ձգվել։
անակոնդա

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։