Պապը չորս թոռնիկների հետ գնաց անտառ՝ սունկ հավաքելու։ Անտառում նրանք ցրվեցին տարբեր կողմեր և սկսեցին սունկ փնտրել։ Կես ժամ հետո պապը նստեց ծառի տակ հանգստանալու և հաշվեց բոլոր սնկերը. պարզվեց, որ հավաքել է 45 սունկ։ Այդ ժամանակ վազելով նրան մոտեցան թոռնիկները՝ բոլորն էլ դատարկ ձեռքերով, ոչ մեկը ոչինչ չէր գտել։
— Պապի,- խնդրում է թոռնիկներից մեկը,- քո հավաքած սնկերից ինձ էլ տուր, որպեսզի զամբյուղս դատարկ չլինի։ Գուցե, քո ձեռքը թեթև լինի, շատ սունկ հավաքեմ։
— Ինձ էլ, պապի։
— Ինձ էլ տուր։
Պապը ամեն մեկին էլ տվեց և, այդպիսով, բաժանեց իր բոլոր սնկերը։ Բոլորը նորից ցրիվ եկան տարբեր կողմեր և պատահեց հետևյալը։ Տղաներից մերկը գտավ ևս 2 սունկ, մյուսը կարցրեց 2 սունկ, երրորդը գտավ այնքան սունկ, ինչքան ստացել էր պապից, իսկ չորրորդը կորցրեց պապից ստացած սնկերի կեսը։ Երբ երեխաները եկան տուն ու հաշվեցին իրենց սնկերը, ապա պարզվեց, որ բոլորն ունեն հավասար քանակությամբ սունկ։
Ամեն մեկը պապից քանի՞ սունկ ստացավ և քանի՞ սունկ կար յուրաքանչյուրի մոտ, երբ նրանք տուն եկան։
Դժվար չէ կռահել, որ պապը ամենաքիչ թվով սունկ տվել է երրորդ թոռնիկին, որովհետև երրորդ թոռնիկը, եղբայրներին հավասարվելու համար, պետք է հավաքեր ևս այդքան սունկ։ Պարզության համար ենթադրենք, որ պապը երրորդ թոռնիկին տվել է մի բուռ սունկ։ Երրորդ թոռնիկը տուն բերեց 2 բուռ, որովհետև նա ինքը ևս գտավ այնքան սունկ, ինչքան տվել էր նրան պապը։ Չորրորդ թոռնիկը տուն բերեց ճիշտ այնքան սունկ, ինչքան որ երրորդը, այսինքն էլի 2 բուռ սունկ։ Բայց նա իր սնկերի կեսը ճանապարհին կորցրել էր, նշանակում է, պապը նրան տվել է 4 բուռ։ Առաջին թոռնիկը տուն բերեց 2 բուռ, բայց այդ սնկերից երկուսն ինքը գտավ, նշանակում է, պապը նրան տվել էր 2 բուռ՝ հանած 2 սունկ։ Երկրորդ թոռնիկը տուն բերեց 2 բուռ և դեռ ճանապահին էլ կորցրեց 2 սունկ։ Նշանակում է, պապը նրան տվել է 2 բուռ՝ ավելացրած 2 սունկ։ Այսպիսով, պապը թոռնիկներին բաժանել է 1 բուռ, էլի 4 բուռ, էլի 2 բուռ՝ հանած 2 սունկ, էլի 2 բուռ՝ ավելացրած 2 սունկ, ընդամենը 9 բուռ (երկու բուռից երկու սունկ պակաս է, բայց մյուս երկուսում երկու սունկ ավելի է)։ 45 սունկը 9 բուռ է, նշանակում է, ամեն մի բուռը պարունակում է 45/9=5 սունկ։ Երրորդ թոռնիկին պապը տվել է 1 բուռ, այսինքն 5 սունկ, չորրորդին՝ 4 բուռ, այսինքն 5×4=20 սունկ, առաջինին՝ երկու բուռ՝ հանած 2 սունկ, այսինքն (5×2)-2=8սունկ, երկրորդին՝ 2 բուռ՝ ավելացրած 2 սունկ, այսինքն (5×2)+2=12սունկ։
