Սովորում ենք օգտվել ժամացույցից

 Ժամացույցը օրվա որոշակի ժամանակը որոշելու համար նախատեսված սարք է։ Այսօր Փոքրիկ.am կայքը կօգնի երեխաներին սովորել օգտվել ժամացույցից։ 1. Ժամացույցի սլաքներն ունեն տարբեր երկարություն։ Մեծ սլաքը ցույց է տալիս րոպեները, իսկ փոքրը՝ ժամի սլաքն է և ցույց է տալիս ժամը։ Այն դանդաղ է պտտվում։ Շրջանը, որի վրա գրված են թվերը, կոչվում է թվատախտակ։

2. Երբ մեծ սլաքը ցույց է տալիս 12 թիվը, այսինքն նայում է ուղիղ դեպի վեր, ապա փոքր սլաքը ցույց է տալիս ուղիղ այն ժամը, որի վրա կանգնած է։ Օրինակ, ասում ենք ուղիղ ժամը 7-ն է։

3. Որպեսզի իմանանք, թե ժամը քանիսն է, պետք է նայենք, թե որ թիվն է ցույց տալիս փոքր սլաքը, և որը՝ մեծը։

4. Տես, այս ժամացույցի վրա մեծ սլաքը ցույց է տալիս 12-ը, իսկ փոքրը՝ 3-ը։ Դա նշանակում է, որ հիմա ժամը ուղիղ 3-ն է։

5. Մեկ ժամվա ընթացքում մեծ սլաքը մի ամբողջ պտույտ է կատարում թվատախտակի վրա։ Յուրաքանչյուր մեծ բաժանումների ու թվերի արանքում թվատախտակի վրա կան ավելի մանր բաժանումներ՝ րոպեները։ Մեկ ժամն ունի 60 րոպե։

6. Քանի դեռ մեծ սլաքը մի ամբողջ շրջան է անցնում թվատախտակի վրա, փոքր սլաքը ևս տեղում չի կանգնում։ Այն դանդաղ շարժվում է դեպի հաջորդ ժամը։

7. Ինչպե՞ս իմանալ, թե քանի րոպե է անցել։ Հիշի՛ր, երբ մեծ սլաքը նայում է ուղիղ դեպի աջ, ապա ժամից անցել է 15 րոպե։ Օրինակ, ասում են՝ այժմ 4-ն անց է 15 րոպե։

8. Երբ մեծ սլաքը նայում է ուղիղ ներքև, ապա ժամից անցել է 30 րոպե, կամ կես ժամ։ Այդ դեպքում ասում են. հիմա 5-ն անց է 30 րոպե, կամ 5-ն անց կես է։

9. Երբ մեծ սլաքը նայում է ուղիղ դեպի ձախ, ապա ժամից անցել է 45 րոպե։ Իսկ այդ ընթացքում փոքր սլաքը մոտեցել է թվատախտակի հաջորդ թվանշանին։ Այդ դեպքում ասում են՝ 3-ն անց է 45 րոպե, կամ 4-ից պակաս է 15 րոպե։ Այսինքն հաջորդ ժամից պակասում է 15 րոպե։

10. Թվատախտակի վրա իրար հաջորդող թվերի արանքում 5 րոպե է։ Երբ մեծ սլաքը ցույց է տալիս 1 թիվը, ապա ժամից անցել է 5 րոպե, իսկ երբ ցույց է տալիս 2 թիվը, ապա ժամից անցել է 10 րոպե։

Մնում է սովորել հաշվել հնգյակներով և արդեն ժամացույցի վրա ժամը կարդալը ոչ մի խնդիր չի առաջացնի։

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։