Կարգապահ հետիոտն

Մի քանի շատ կարևոր խորհուրդ փոքրիկ հետիոտների համար։ 

1. Փողոցը հատել կարելի է միմիայն հետիոտների համար նախատեսված ստորգետնյա, վերգետնյա անցումներով կամ փողոցի վրա նշված հետիոտնային անցումով՝ սպասելով, որ լուսակրի լույսը անցորդի համար կանաչի։
2. Անպայման հետևել լուսակրի լույսին։ Դեղին կամ կարմիր լույսի դեպքում փողոցը հատել չի կարելի։ Իսկ եթե լույսը կանաչ է, ապա նախևառաջ պետք է նայել ձախ։ Եթե շարժվող ավտոմեքենա չկա, ապա պետք է քայլել մինչև փողոցի մեջտեղի հատվածը։ Այնտեղ պետք է կանգնել և նայել աջ։ Եթե այստեղ ևս ավտոմեքենաների շարժ չկա, կարելի է շարունակել ճանապարհը։ Բայց ամեն դեպքում, պետք է լինել շատ ուշադիր, քանի որ կարող է թեքվող մեքենա հանդիպել կամ ձայնային ու լուսային ազդանշով սլացող «Շտապ օգնության» մեքենա։
Անցորդների համար լուսակիրների վրա կան հատուկ նշաններ՝ կանգնած կարմիր մարդուկ՝ կանգնի՛ր, և կանաչ քայլող մարդուկ՝ անցի՛ր։
3. Եթե ճանապարհի վրա հետիոտնային անցում չկա, ապա փողոցը հատել կարող ես միայն երկու դեպքում՝
-եթե փողոցը լավ տեսանելի է երկու կողմից։
-եթե ճանապարհի վրա երևացող ավտոմեքենայի և քո միջև հեռավորությունը ավելի շատ է, քան փողոցային լապտերների 3 սյուները (այդ հեռավորության դեպքում դու կհասցնես անվտանգ անցնել փողոցը)։
Փողոցը պետք է անցնել քայլելով, և ո՛չ վազելով։
4. Ավտոբուսը և տրոլեյբուսը պետք է շրջանցել հետևից։ Դիմացից անցնելու դեպքում չես տեսնի նրանց հետևից եկող ավտոմեքենան։
5. Չի կարելի խաղալ փողոցի բանուկ մասում և նույնիսկ մայթի վրա։ Խաղերի համար կան խաղահրապարակներ և բակեր, որտեղ մեքենաների հոսք չկա։
6. Չբնակեցված վայրերում հետիոտնը պետք է քայլի միայն ճանապարհի կողնակով կամ երթևեկելի հատվածի եզրով՝ ընթացող ավտոմեքենաների ընթացքին հակառակ։
Երբեք չի՛ կարելի վազել դեպի փողոց նույնիսկ քաղաքում, իսկ մայրուղիների վրա՝ առավել ևս, քանի որ այստեղ մեքենաներն ավելի արագ են ընթանում։
7. Երկաթուղային գծերը հատելիս շատ ուշադիր եղեք։ Ճիշտ է, գնացքը հեշտ է նկատել հեռվից, բայց գնացքներն ավելի արագ են սուրում, իսկ գնացքը միանգամից արգելակելը անհնար է։
8. Ձմռանը, երբ օրերը շուտ են մթնում, մայրիկին կամ հայրիկին խնդրիր գնել լույս անդրադարձնող հարմարանք և դա ամրացրու պայուսակիդ կամ վերնազգեստիդ։ Այդ դեպքում լուսարձակները միացրած ավտոմեքենաների լույսը կանդրադարձվի և դու ավելի նկատելի կլինես։

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։