Եթե դու հյուր ես

Անսպասելի այցը սովորաբար անհանգստություն է պատճառում։ Առանց զգուշացնելու հյուր գնա միայն խիստ անհրաժեշտության դեպքում։
Եթե դուռը երկու անգամ թակել կամ զանգը հնչեցրել ես, ու դուռը չեն բացել, պետք չէ կոտրել դուռը, այլ պետք է հանգիստ հեռանալ։
Հյուր գնալիս տգեղ բան է «բնակարանը գնահատելը», նկատողություններ անելը։ Մի հարցրու, թե ինչը որտեղից են գնել։ Դարակների վրայից հուշանվերները մի վերցրու՝ ուսումնասիրելու համար։

Ի՞նչ նվեր տանել

Նվերը պետք է որոշ նպատակ ունենա։ Տատիկին չարժե չմուշկներ նվիրել, փոքրիկին՝ հաշվիչ մեքենա, պապիկին՝ տիկնիկ և այլն։ Նվերը պետք է ուրախություն պատճառի։ Պետք է գնահատել դիմացինին ու նրա ճաշակը հաշվի առնել նվեր ընտրելիս։ Նվեր տալիս դու ոչ թե քո շռայլությունն ես ցուցադրում, այլ դիմացինին ուրախացնում ես։
Եթե գումար չունես, պետք չէ ծնողների դրամապանակը դատարկել։ Ավելի լավ է ինքդ ստեղծագործես՝ նկարես կամ պատրաստես ինչ-որ բան։
Նվեր նվիրելիս չմոռանաս բարի մաղթանքներն ու ժպիտը։
Իսկ նա, ով նվեր է ստանում, պետք է հիշի, որ «նվեր ձիու ատամները չեն հաշվում», այսինքն միշտ պետք է շնորհակալություն հայտնի, նույնիսկ եթե նվերն իր ճաշակով չէ։

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։