Պլաստիլինով ծեփի առաջին քայլերը

Ինչպես ստանալ գլանաձև պատկեր

Գլանը առաջին պատկերն է, որ երեխան կարող է ինքնուրույն ծեփել արդեն 1-1.5 տարեկան հասակում։
Հետագայում նա կարող է այդ գլանը ձևափոխել բարակ ու հաստի, երկար ու կարճի, միագույն ու բազմագույն պատկերների։ Եվ իհարկե, դրանցով նա կպատկերի մատիտներ, մատիկներ, ծառեր և այլ այն ամենը, ինչը ծանոթ է նրա մտահորիզոնին։ 2.5-3 տարեկանում երեխան արդեն փորձում է ճշտորեն արտահայտել պատկերները։ Նա գլանը սկսում է ձևափոխել բոլոր իրեն հասանելի մեթոդներով։

Գլանաձև պատկեր ստանալ կարելի է.
– Պլաստիլինի մի կտոր ձեռքի ափերի մեջ գլորելով՝ հետ ու առաջ տանելով
– Պլաստիլինի մի կտոր կոշտ մակերեսի վրա ձեռքի ափի օգնությամբ հետ ու առաջ գլորելով
– Պլաստիլինի կտորը մատերի ծայրերի միջև գլորելով (ցուցամատի և բութ մատի)։ Այս մեթոդի դեպքում ստացվում են շատ փոքրիկ գլանիկներ

Ինչպե՞ս ձևափոխել գլանաձև պատկերը

– կարելի է օղակաձև պտտեցնել (ստանալով օրինակ անիվներ, մատանի և այլն)
– սպիրալաձև պտտեցնել (ստանալով օձ, խխունջ և այլն)
– տափակեցնել և ձևափոխել ժապավենի (ստանալ տերև, վզնոց)
– ձևափոխել կոնի (ստանալ գազար)
– մի քանի գլանների իրար համակցել, ստանալով բույս և այլն

Ինչպե՞ս ստանալ գնդաձև պատկեր
Գունդը ևս այնպիսի պատկեր է, որը երեխան կարող է ստանալ դեռ վաղ մանկությունում։ Պետք է նկատել, որ գնդի ստացումն ավելի բարդ է, ան գլանինը, քանի որ ավելի ճշգրիտ ու ձեռքերի համաչափ աշխատանք է պահանջում։

Գունդ ստանալ կարելի է՝

– պլաստիլինի կտորը ձեռքերի մեջ շրջանաձև շարժումներով գլորելով
– մի ձեռքով պլաստիլինի կտորը կոշտ մակերեսի վրա շրջանաձև գլորելով
– երկու մատերի ծայրերով պլաստլինի կտորը շրջանաձև գլորելով. այս դեպքում ստացվում են շատ փոքր գնդեր (աչքեր, քիթիկ և այլն)

Ինչպես ձևափոխել գունդը
– թեթևակի ձգելով երկու ծայրերից ստանալ օվալ (կինդեր-ձվիկ, փուչիկ, դդում)
– մի ծայրից ձգելով (ստանալ տանձ)
– գլորել ու անհրաժեշտության դեպքում ծռմռել (ստանալով բանան, վարունգ), սեղմելով ձեռքի ափերով ստանալ տափակ օղակ (անիվ)
– կոնաձև գլորել (ստանալով ասենք պաղպաղակ կամ բուրգ)
– մի կողմից տափակեցնել (ստանալով բզեզ, բլիթ)
– մատի կամ մատիտի օգնությամբ վրան խորություն ստեղծել (ստանալով սնկի գլխարկ, բաժակ)

Գնդի, գլանի և դրանց ձևափոխությունները ծեփի առաջին քայլերն են, որոնց հիմքի վրա երեխան սկսում է ինքնուրույն ծեփել ցանկացած պատկեր։