Օրիգամիի օգտակարությունը երեխաների համար

Օրիգամին թղթից պատկերներ պատրաստելու արևելյան երկրների հին արվեստ է։
Թուղթը ծալծլելով պատկերներ ստանալ սիրում են հատկապես երեխաները։ Այս զբաղմունքը երեխաների համար օգտակար ու հետաքրքիր է, քանի որ այն օգնում է զարգացնել երևակայությունը, տրամաբանությունը, տեսողական ու տարածական մտածողությունը։ Օրիգամիի վարպետները գտնում են, որ այն անձնավորությունը, ում հետաքրքրեց օրիգամին, ամբողջ կյանքում կդառնա նրա հավատարիմ երկրպագուն։

Մի քանի փաստ օրիգամիի մասին

Արևելյան այս արվեստի անվանումը բաղկացած է երկու մասից՝ «օրի», որըթարգմանվում է ծալած, և «գամի», որը թարգմանվում է թուղթ կամ աստվածային։ Այն բանից հետո, երբ «Ծագող արևի երկրում» իմացան թղթի արտադրության մասին, թուղթը դարձավ հրաշքներ արարելու միջոց, իսկ թղթից պատկերներ ստեղծելու արվեստին տիրապետելը խոսում էր մարդու կրթվածության մասին։ Իսկզբանե, օրիգամիի պատկերները զուտ կրոնական ուղղվածություն ունեին։ Ճապոնացիները հավատում էին, որ օրիգամիի միջոցով պատրաստված թղթե պատկերներն իրենց ցանկությունը կարող են հասցնել աստվածներին։

Ի՞նչ է պետք օրիգամիով զբաղվելու համար

Եթե որոշել եք փոքրիկին ծանոթացնել օրիգամիի հետ, ապա անհրաժեշտ է ունենալ տարբեր գույների թուղթ, քանոն, մկրատ, սոսինձ, մատիտ։ Իհարկե, առանց օրիգամիի սխեմայի գործը բավականին կբարդանա։ Միգուցե պետք կգան նաև տարատեսակ հուլունքներ, ժապավեններ և այլ մանրուքներ։
Օրիգամիի թուղթը պետք է հնարավորինս հաստ լինի, որպեսզի պատկերներն իրենց ձևը պահպանեն։ Որպես օրիգամիի թուղթ կարող է ծառայել հասարակ գրասենյակային սպիտակ թուղթը։

Օրիգամիի օգուտները

1. Հասարակ օրիգամին երեխաների համար անգնահատելի օգտավետ կարող է լինել։ Օրինակ, շատ ծնողներ ու դաստիարակներ օրիգամին կիրառում են երեխայի մոտ կենտրոնանալու հատկությունը զարգացնելու համար։ Այս զբաղմունքը փոքրիկների համար հանգստացնող հատկություն ունի, իսկ ստացված արդյունքը կարող է նրանց ուրախացնել, հնարավորություն տալ իրեն հաղթանակող զգալ։
2. Թղթից պատկերներ պատրաստելը ձեռքերի համար լավ մարզում է, այն զարգացնում է մանր մոտորիկան։ Ձեռքերի հետ միաժամանակ մարզվում են երեխայի հիշողությունն ու տրամաբանությունը։
3. Այսօր բարձր է գնահատվում ստեղծագործությունն ու ոչ ստանդարտ մտածողությունը։ Այս հատկություններն ի հայտ կգան երեխայի մոտ օրիգամիով զբաղվելիս։ Միաժամանակ երեխան կսովորի հետևել հրահանգներին, չվախենալ բարդ առաջադրանքներից և դրանք հաջողությամբ կատարել։
4. Օրիգամին օգնում է զարգացնել մաթեմատիկական մտածողությունը՝ կշռադատել, տարածական մտածել, փնտրել առաջադրանքի լուծման ոչ ստանդարտ եղանակներ։
5. Բացի վերը թվարկվածներից, օրիգամի պատրաստվածքները կարող են գեղեցիկ նվերներ լինել։ Սեփական ձեռքերով հուշանվերներ պատրաստելով, երեխան հրճվանք է զգում ստեղծագործելիս։ Այն բարձրացնում է երեխայի ինքնագնահատականը, մղում ավելի գեղեցիկ ու բարդ պատկերներ պատրաստելուն։

Օրիգամին երեխաների համար օգտակար ու հաճելի զբաղմունք է, որը կարող է զարգացնել փոքրիկի ֆիզիկական, մտավոր և ստեղծագործական հատկությունները։ Անհրաժեշտ հմտությունները ձեռք բերելու համար պետք է ունենալ պարզապես թուղթ և սխեմաներ։ Ձեր փոքրիկն իրեն ինքնավստահ կզգա յուրաքանչյուր նոր օրիգամի պատրաստելով։

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։