Երեք ֆոկուս

Ինչո՞վ է երեխան տարբերվում մեծահասակից։ Նրանով, որ փոքրիկը հավատում է հրաշքներին։ Իսկ ինչքա՞ն երջանիկ կլինի փոքրիկը, երբ ինքը դառնա հրաշագործ ու զարմացնի հանդիսատեսին։ Հագցրեք Ձեր փոքրիկին հրաշագործի հագուստներ, սովորեցրեք նրան այս ֆոկուսները և տեսեք, թե ինչքան երջանիկ ու գոհ է նա։

Ընկնող բաժակը

Ֆոկուսը. աճպարարը նստած է հանդիսատեսի դիմաց՝ սփռոցով ծածկված սեղանի առջև։ Սեղանին բաժակ է դրված։ Բաժակը աճպարարը ծածկում է փայլաթիթեղի շերտով, փայլաթիթեղը այնպես սեղմում, որ այն բաժակի տեսքն ընդունի։ Այնուհետև բաժակը դեպի իրեն է շարժում՝ ցույց տալու համար, որ սեղանի վրա որևէ անցք չկա, և վերադարձնում տեղը։ Դրանից հետո նա ձեռքով ուժեղ հարվածում է բաժակին և, օ հրաշք, ճմրթված փայլաթիթեղի տակ ոչինչ չկա, իսկ սեղանի տակից ընկնող բաժակի ձայն է գալիս։ Բաժակը սեղանի միջով ընկավ ցած։
Ի՞նչ է անհրաժեշտ.
* սփռոց
* փայլաթիթեղ
* մեկանգամյա օգտագործման պլաստիկե բաժակ
Ինչո՞ւմ է գաղտնիքը. Երբ աճպարարը փայլաթիթեղով ծածկված բաժակը դեպի իրեն է քաշում, ցույց տալով սեղանի վրա անցքի բացակայությունը, աննկատելիորեն բաժակը գցում է իր ծնկների վրա։ Իսկ փայլաթիթեղե պատյանը արդեն դատարկ վիճակում է հետ վերադարձնում իր տեղը։ Հարվածելով «բաժակին» աճպարարը միաժամանակ ծնկներից ցած է նետում իսկական բաժակը։

Գունավոր ջուրը

Ֆոկուսը. Հրաշագործը վերցնում է թափանցիկ տարա, նրա մեջ լցնում սովորական ջուր ու փակում կափարիչով։ Այնուհետև վերցնում է տարան, արտասանում կախարդական բառերը և տարան ցնցելով խառնում միջի ջուրը։ Ջուրը դառնում է այն գույնի, որն աճպարարն ասել է կախարդական բառերն արտասանելիս։
Կախարդական խոսքերը.

Դե խառնվիր ջուր թափանցիկ,
Գնա-արի, գնա-արի
Ու ներկվիր «կարմիր» գույնի։

Ի՞նչ է անհրաժեշտ.
* Թափանցիկ տարա
* Ջուր
* Ջրաներկ կամ գուաշ
Ինչո՞ւմ է գաղտնիքը. Նախապես աճպարարը տարայի կափարիչի վրա քսում է ջրաներկը կամ գուաշը։ Ջրով լի տարան կափարիչով փակելիս պետք է ուշադիր լինել, որպեսզի հանդիսատեսը չտեսնի ներկը։ Տարան ցնցելուց ջրաներկը խառնվում է ջրի հետ ու ներկում նրան։

Նարինջ ձևացնող խնձորը

Ֆոկուսը. Հրաշագործը հանդիսատեսին ցույց է տալիս նարինջը և այն ծածկում վառ գույներով թաշկինակով ու արտասանում կախարդական բառերը։ Այնուհետև, բարձրացնում է թաշկինակը, իսկ նրա տակ նարինջը խնձոր է դարձել։ Հանդիսատեսը նույնիսկ կարող է համտեսել այն։
Ի՞նչ է անհրաժեշտ.
* Նարինջ
* Խնձոր
* Սուր դանակ
Ինչո՞ւմ է գաղտնիքը. Մինչ ֆոկուսի ցուցադրությունը աճպարարը զգուշությամբ հանում է նարնջի կեղևը (միջուկը կարելի է անմիջապես ուտել)։ Այնուհետև խնձորը, որը պետք է նարնջից փոքր լինի, զգուշորեն տեղադրում է նարնջի կեղևի մեջ։ Ֆոկուսը ցուցադրելիս «նարինջը» պետք է ամուր բռնել ձեռքի մեջ, որ հանկարծ ցած չընկնի։ Երբ արագ շարժումով թաշկինակը վերցնում է «նարնջի» վրայից, պետք է այնպես անել, որ նարնջի կեղևը ևս թաշկինակի հետ վերև բարձրանա ու սեղանին մնա խնձորը։ Որպեսզի ֆոկուսի իմաստը չգուշակեն, ցանկալի է թաշկինակը անմիջապես գրպանը դնել։