Վարդեր բամբակյա շերտերից

Սիրելի երեխաներ, ձեզ ենք ներկայացնում բամբակյա շերտերից վարդեր պատրաստելու եղանակը։ Այն գեղեցիկ նվեր կդառնա ձեր մայրիկներին, տատիկներին ու սիրելի քույրիկներին։

Վարդերը պատրաստելու համար անհրաժեշտ են բամբակյա շերտեր, ամուր թել և մի փոքր ժամանակ։
Առաջին հերթին պետք է պատրաստել վարդի հիմնական ծաղկաթերթիկը, որի շուրջը կտարածվեն մյուս ծաղկաթերթերը։ Հենց այս հիմքի պատրաստման որակից էլ կախված է, թե վերջում ինչ տեսք կունենա վարդը։

1. Վերցնենք 1 բամբակյա շերտ։ Մի ծայրը սեղմելով այն պարույրաձև փաթաթում ենք։

2. Ամուր բռնելով նեղ ծայրը, ծաղկաթերթի շուրջը փաթաթում ենք մեկ այլ բամբակյա շերտ։

3. Առանց ամրացնելու շերտերը փաթաթում ենք 3-րդ շերտը երկրորդ ծաղկաթերթի շուրջ այնպես, որ այն ծածկի կիսով չափ։

4. Նման ձևով փաթաթում ենք մնացած ծաղկաթերթերը։

Հարկ է նշել, որ բոլոր ծաղկաթերթերը պետք է նույն մակարդակի վրա լինեն։ Այդպես պատրաստվածքն ավելի կոկիկ ու գեղեցիկ տեսք է ունենում։
Սովորաբար ամբողջ վարդը ստանալու համար անհրաժեշտ է լինում 7-8 բամբակյա շերտ։ Եթե շերտերը քիչ են, ապա վարդը փոքր կստացվի, իսկ եթե շատ լինեն, ապա կստանանք չափից դուրս բացված վարդ, որն այնքան էլ գեղեցիկ չէ։

5. Ծաղկաթերթերը փաթաթելուց հետո վերցնենք ամուր թել և մի քանի անգամ փաթաթենք վարդի ծաղկապսակի սեղմված հատվածը։

Վարդը կարելի է դնել սովորական ծաղկամանի մեջ, որը լցված է ոչ թե հողով, այլ սովորական անձեռոցիկներով, կտորներով։

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։