Ոսկե ձկնիկներն ու ծովը

Այսօր փայլաթիթեղից կպատրաստենք փայլփլուն ձկնիկներ և դրանց բաց կթողնենք մեր նկարած ծովի մեջ։

Անհրաժեշտ են՝ ջրաներկ, ֆլոմաստերներ, ստվարաթուղթ, աղ, փայլաթիթեղ, ցանցավոր կտոր։

1. Ծով ստանալու համար ստվարաթուղթը ներկենք երկնագույն, ապա դրա վրա շաղ տանք կապույտ ջրաներկ, և, քանի դեռ թուղթը թաց է, թղթի վրա շաղ տանք խոշոր աղ։

2. Երկինք ստանալու համար մեկ ուրիշ ստվարաթուղթը ներկենք բաց երկնագույն ջրաներկով, ապա մի քանի կետում կաթեցնենք համեմատաբար մուգ երկնագույնը։ Այնուհետև այդ հատվածները «սրբենք» անձեռոցիկով։

3. Քանի դեռ ներկը չորանում է, փայլաթիթեղի վրա նկարենք ձկան ուրվագիծը, իսկ այնուհետև փայլաթիթեղի տակ տեղադրենք ցանցավոր կտորը։

4. Եղունգը թեթևակի սեղմելով տանենք-բերենք փայլաթիթեղի վրա։ Արդյունքում կստանանք ձկան թեփուկների տեսքով նախշ։

5. Ձկնիկը ներկենք ֆլոմաստերներով։ Օրինակ՝ ձկան մեջքը կարող է լինել կանաչ գույն, իսկ փորը՝ դեղին։ Պատրաստի ձկնիկներին կտրատենք մկրատով։

6. Այն թղթի վրայից, որի վրա նկարված էր ծովը, թափ տանք աղը և անկյունագծով ալիքաձև գիծ գծենք։ Այդ գծով կտրենք թուղթը։ «Ծովը» և ձկնիկները սոսնձենք երկնքի վրա։

Աշխատանքը պատրաստ է.