Ընտանեկան փաթիլներ

Փոքրիկների նկարներով փաթիլները յուրահատուկ տեսք կհաղորդեն զարդարված տանը։ Այս փաթիլները պատրաստելու համար անհրաժեշտ են.
գրասենյակային սպիտակ թուղթ, հաստ ստվարաթուղթ (օրինակ կոշիկի կամ այլ իրի տուփի թուղթը), սև հասարակ մատիտ, մկրատ, սոսինձ, գրասենյակային դանակ, ներկեր, փաթիլը զարդարելու համար թելեր, փայլեր, և ամենակարևորը՝ լուսանկար։

Գրասենյակային սպիտակ թղթից պատրաստենք փաթիլի շաբլոնը։ Դրա համար ուղղանկյուն թուղթը դարձնում ենք քառակուսի, ապա անկյունագծով ծալում.

Ներքևի անկյուններն իրար վրա բերելով գտնում ենք ներքևի կողմի կենտրոնը (միայն կենտրոնի հատվածն է անհրաժեշտ թեթևակի սեղմել).

Այժմ եռանկյան անկյունները ծալում ենք դեպի դիմացի կողմը.

Վերին ավելորդ հատվածները կտրելով, ստանում ենք եռանկյուն.

Եռանկյան կողերի վրա ուրվագծում ենք այն պատկերների կեսերը, որոնք ուզում ենք ստանալ։ Մեր օրինակում կնկարենք եղևնու և ձնեմարդու կեսերը, կամ նապաստակի կեսը, ապա մկրատով կտրում ուրվագծերով։ Անհրաժեշտ է հիշել, որ մեզ անհրաժեշտ է կենտրոնում չկտրված հատված։ Դրա համար ուրվագծերը նկարվում են եռանկյան վերին հատվածում.

Ստվարաթղթի վրա շաբլոնի օգնությամբ ուրվագծում ենք ստացված փաթիլները.

Գրասենյակային դանակի օգնությամբ զգուշորեն կտրում և հեռացնում ենք ավելորդ մասերը։ Չմոռանաք աշխատել կարծր մակերեսի վրա, որպեսզի աշխատանքային սեղանը չվնասեք։

Ներկերի օգնությամբ համապատասխան պատկերները գունազարդում ենք և թողնում ենք, որ ներկը չորանա։

Աշխատանքի հաջորդ հատվածը փաթիլի վերջնական ձևավորման փուլն է։

Եթե փաթիլի հակառակ կողմը գեղեցիկ պատկեր է, ապա այն կարելի է այդպես էլ թողնել։ Իսկ եթե հակառակ կողմը ակնահաճո չէ, ապա կարելի է նկարազարդ անձեռոցիկից համապատասխան կտոր կտրել և փակցնել այդ մակերեսին.

Վերցնում ենք լուսանկարը և այն կտրում փաթիլի կենտրոնական հատվածին համաչափ։

Ստացված պատկերը սոսնձում ենք փաթիլի կենտրոնական հատվածին։

Գեղեցիկ թելերի, բամբակի կամ փայլերի օգնությամբ զարդարում ենք նկարի եզրերը.

Փաթիլը պատրաստ է։ Մնում է միայն ասեղի օգնությամբ զգուշորեն ծակել փաթիլի վերին հատվածը և թել անցկացնել.

Այսպիսի փաթիլներ կարելի է պատրաստել յուրաքանչյուր տարի և դրանք կախել տոնածառի վրա, որպես խաղալիք։ Տարիների ընթացքում նմանատիպ խաղալիքները կշատանան և ձեր տոնածառը կլինի յուրահատուկ իր զարդարանքի մեջ։

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։