Կախարդական կատուն

Մի շքեղ պալատում ապրում էր թագավորը՝ կնոջ և դստեր հետ։ Գրեթե ամեն օր թագուհին դստեր հետ զբոսնում էր այգում։ Հերթական զբոսանքի ժամանակ նրանց դիմաց դուրս է գալիս մի հսկա, կեղտոտ, ցեխոտ կատու։

Թագուհին սկզբում վախենում, հետո զզվանքով քշում է նրան։ Վերջինս էլ շրջվում ու հեռանում է։ Արքայադուստրը սկսում է արտասվել․ պահանջում է ետ բերել կատվին, քանի որ շատ է սիրում կենդանիներ։ Թագուհին հրամայում է ծառաներին գտնել, ետ բերել, մաքրել, հարդարել կատվին։ Այդ օրվանից կատուն դառնում է արքայադստեր անբաժան ընկերը և սկսում է ապրել պալատում։

Տարիներ են անցնում աղջիկը մեծանում է, գեղեցկանում, սակայն, իր ամենօրյա զբոսանքները կատվի հետ՝ անտառում, չեն դադարում։

Այդ անտառում է ապրում հրեշը, որը ցանկանում է կնության առնել գեղեցիկ արքայադստերը, այդ իսկ պատճառով փախցնում է նրան։ Դադարում են աղջկա առավոտյան զբոսանքները, քանի որ հրեշը նրան պահում է փակի տակ։ Մի առավոտ աղջիկը դիմում է խորամանկության․ սնկով ապուր պատրաստելու պատրվակով՝ համոզում է հրեշին դուրս գալ անտառ՝ սնկի ետևից։ Քանի որ հրեշը սիրում է համեղ ուտել համաձայնում է։ Աղջիկը հիացմունքով և կարոտած վազում է անտառ, շրջում իր սիրած արահետներով, լսում թռչունների դայլայլը, հանդիպում իր սիրած կատվին, և ժամանակը լրանալուն պես՝ սնկով լի զամբյուղով,վերադառնում հրեշի պալատ։ Կատուն էլ իր հերթին ծածուկ սողոսկում է ներս։ Սնկով ապուրի ակնկալիքով հրեշը ժամանակից շուտ է վերադառնում տուն։ Արքայադուստրը ապուրով լի ամանը դնում է հրեշի առաջ՝ չիմանալով, որ կատուն այնտեղ  կծու տաքդեղ է լցրել։ Հրեշը ամանը շրջում է բերանի մեջ և այրում կոկորդը․ վեր է թռչում տեղից,վազում անտառ, որպեսզի կոկորդը հովացնի գետի ջրով։ Կատուն վրա է հասնում, փռվում հրեշի ոտքերի տակ, վերջինս էլ սայթաքում, գլորվում է անդունդը։

Ա՜յ քեզ զարմանք, կատուն վերափոխվում է հրաշք արքայազնի, վազում արքայադստերն ընդառաջ և պատմում, որ տարիներ առաջ կախարդը իրեն տվել է կատվի կերպարանք` իր չար ու նենգ բնավորության պատճառով։ Սակայն, կախարդանքը պետք է անցներ այն ժամանակ, երբ ինքը որևէ մեկին օգներ։ Աղջիկը սկզբում ամաչում է, հետո բռնում արքայազնի ձեռքը և մտնում պալատ։

Յոթ օր, յոթ գիշեր հարսանիք են անում և մինչ օրս ապրում են խաղաղ ու երջանիկ` բարիք գործելով։

Մարդի՛կ, մի՛ կորցրե՛ք ձեր մարդկային կերպարը

Բարիք գործե՛ք

Թարգմանեց Ժաննա Կոբելյանը

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։