Ինչպե՞ս պահել քեզ սեղանի մոտ

Մի քանի խորհուրդ սեղանի մոտ ճիշտ պահվածքի համար.

– Արմունկները սեղանին մի՛ դիր։ Սեղանի վրա պետք է լինեն միայն դաստակները։
– Սնունդն ու աղցանը ընդհանուր ամանից քո ափսե տեղափոխիր ոչ թե քո անձնական գդալ-պատառաքաղով, այլ այն գդալներով, որոնք դրված են ընդհանուր ամանի մեջ։
– Գդալը կամ պատառաքաղը մոտեցրու փոքր-ինչ կռացած գլխիդ, բայց երբեք մի՛ «պառկիր» ափսեի վրա։
– Սնունդը անպայման ծամիր փակ բերանով՝ ոչ դանդաղ, ոչ արագ։ Լիքը բերանով մի՛ խոսիր։
– Ափսեի մեջ դիր այնքան սնունդ, որն ամբողջությամբ կուտես։
– Երբ ուտելու գործընթացը կվերջացնես, դանակն ու պատառաքաղը դիր ափսեիդ մեջ աջ կողմում՝ իրար զուգահեռ։

Այժմ փոքրիկ խնդիր սեղանը դասավորելու վերաբերյալ։
Տրված են՝ մոմլաթ, սփռոց, անձեռոցիկներ, ափսեներ՝ խորը և տափակ, բաժակներ, գավաթներ, պատառաքաղներ, դանակներ, գդալներ (ճաշի, դեսերտի և թեյի), ծաղիկներ և ծաղկաման։
Անհրաժեշտ է ամենը սեղանին դասավորել այնպես, որ ստացվի գեղեցիկ, հարմար ու ճիշտ։

1. Սեղանի մակերեսին փռել մոմլաթը, այնուհետև սփռոցը։
2. Մտովի սեղանի եզրից 2-3 սմ հեռավորության վրա ուղիղ գիծ տար ու նրա վրա դասավորիր ափսերները՝ յուրաքանչյուրը աթոռի դիմաց։ Եթե ճաշի սեղան է պատրաստվում, ապա տափակ ափսեի վրա պետք է դնել խորը ափսեն։
3. Դանակները տեղադրվում են ափսեի աջ կողմում այնպես, որ նրանց սայրը ուղղված լինի դեպի ափսեն, իսկ պատառաքաղները՝ ձախ կողմում, ծայրերով դեպի վեր։ Ճաշի և դեսերտի գդալները տեղադրվում են ափսեի հետևում՝ սեղանի եզրին զուգահեռ, այնպես, որ գդալի պոչերը լինեն աջ կողմում։
4. Ջրի կամ հյութի բաժակները տեղադրվում են ափսեների աջ կղմում։ Անձեռոցիկները՝ ափսեների վրա։ Իսկ ծաղիկները կզարդարեն սեղանը։

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։