Երեխայի կյանքի առաջին տարիները ստեղծագործական հնարավորությունների զարգացման ամենաարդյունավետ տարիներն են։ Այդ հասակում ամենագործածական և արդյունավետ զբաղմունքը ծեփն ու նկարչությունն են։
Այս զբաղմունքի համար անհրաժեշտ են՝
Ներկեր, թղթեր, պլաստիլին, գոգնոց, ծածկոց, անձեռոցիկներ և այլն։
Ծեփում ենք…
1.5-2 տարեկան երեխաները հաճույքով զբաղվում են ծեփով՝ ձեռքերի ու մատների օգնությամբ տրորելով պլաստիլինը։ 3 տարեկանին մոտ փոքրիկներն արդեն կարողանում են ծեփել իրենց լավ ծանոթ պարզ պատկերներ՝ խնձոր, սունկ, ձնեմարդ և այլն։
«Կերակրենք ծիտիկներին»
Այս զբաղմունքի համար անհրաժեշտ է պլաստիլին, կանաչ ստվարաթուղթ, ինչպես նաև ծիտիկի պատկերներ՝ խաղալիք կամ կտրված թղթից։ Սովորեցրեք երեխային պլաստիլինից մանր կտորներ պոկել։ Ցույց տվեք, թե ինչպե՞ս պետք է պատրաստել դրանցից հացահատիկ՝ ցուցամատի և բութ մատի օգնությամբ պլաստիլինին ձև տալով։ Այնուհետև փոքրիկի հետ հացահատիկը տեղադրեք խոտի վրա և կերակրեք ծիտիկներին։
«Գնդլիկ Բոքոնիկ»
Մինչ այս զբաղմունքը երեխային պատմեք «Գնդլիկ Բոքոնիկի» հեքիաթը։ Պլաստիլինի կտորը դրեք ձախ ձեռքի ափի մեջ, ապա աջ ձեռքի շրջանաձև շարժումներով գլորեք պլաստիլինն ու ծեփեք գունդ։ Փոքրիկի հետ Գնդլիկ Բոքոնիկին գլորեք նախապես նկարված ճանապարհով. «Ինձ տաշտակից են քերել, վառարանում են թխել, լուսամուտին եմ սառել, ես փախել եմ տատիկից, ես փախել եմ պապիկից…»
Նկարում ենք…
Բոլոր երեխաները սիրում են նկարել։ Ներկերի հետ ծանոթությունը կարելի է սկսել մոտ 1 տարեկանից, իսկ եթե շտապում եք, ապա 6-7 ամսականից. ավելի շուտ իմաստ չունի։ Մինչև մեկ տարեկան երեխաները նկարում են մատիկներով ու թաթիկներով, իսկ մի փոքր մեծանալուց հետո արդեն կարելի է վրձին տալ երեխայի ձեռքը։ Մատիտներ ու ֆլոմաստերներ երեխաներին պետք է տալ միայն այն ժամանակ, երբ նրանք կարողանան դրանք ճիշտ և հաստատուն բռնելը։ Սովորաբար դա լինում է մեկ տարեկանի մոտ կամ փոքր-ինչ ավելի ուշ։
«Ճանապարհ տիկնիկի համար»
Նախօրոք պատրաստեք մեծ թուղթ, ներկեր՝ մատիկներով նկարելու համար և տիկնիկ (նապաստակ, մկնիկ և այլն)։ Ցույց տվեք փոքրիկին խաղալիքն ու ասեք. «Սա Անուշիկն է, նա պատրաստվում է հյուր գնալ ուրիշ տիկնիկի։ Եկ միասին նկարենք ճանապարհը, որպեսզի Անուշիկը չկորի»։
Երեխայի մի մատիկը թաթախեք ներկի մեջ և ուղիղ գիծ գծեք թղթի վրա, ապա այդ գծի կողքը ևս մեկ այլ գիծ։ Կստանաք ճանապարհը։ Երբ ներկը չորանա, խաղացեք նկարի վրա՝ տիկնիկը ճանապարհով հյուր է գնում այլ տիկնիկի։
«Թաքցնենք նապաստակին»
Ցույց տվեք երեխային նախօրոք նկարված նապաստակին. «Տես, սա նապաստակ է։ Աղվեսը ուզում է նրան բռնել։ Եկ օգնենք նապաստակին ու թաքցնենք նրան»։
Վերցրեք ներկի մեջ թաթախված սպունգը և դրա ներկով ծածկեք նկարված նապաստակը։ Այնուհետև առաջարկեք փոքրիկին, որ ինքը թաքցնի նապաստակին։
«Տերևներ»
Մեծ թղթի վրա նկարեք ծառի բունն ու ճյուղերը։ «Թղթի վրա ի՞նչ է նկարված։ Ճի՛շտ է, ծառ։ Իսկ գիտե՞ս, թե ի՞նչ է աճում ծառի վրա։ Իհարկե՛, տերևներ։ 
Բայց մեր ծառը տերևներ չունի։ Եկ միասին նկարենք տերևները»։
Լայն վրձնի կամ սպունգի օգնությամբ երեխայի ափը պատեք ներկով, և ափը դրեք թղթի վրա։ Թույլ տվեք երեխային ինքնուրույն նկարել բազմերանգ տերև-թաթիկներ։
Չմոռանաք ոգևորել ու գովել երեխային. «Կեցցես, ինչքա՜ն գեղեցիկ տերևներ ես նկարում»։
