Երեխաները ձգտում են միշտ շարժվել։ Շարժական խաղերն օգնում են փոքրիկների շարժական ակտիվությանը, զարգացնում են նոր խաղային հմտություններ, կողմնորոշումը տեղանքում և ուշադրությունը։ Մի ափսոսացեք ժամանակը և խաղացեք երեխայի հետ։ Ձեր ուշադրությանն ենք ներկայացնում մի քանի շարժական խաղեր, որոնց իրագործման համար անհրաժեշտ չէ որևէ հատուկ սարքավորում և որոնք կարելի է խաղալ մեկ կամ մի քանի երեխաների հետ։
«Հասիր փուչիկին»
Փուչիկը (կամ փուչիկները) երեխայի գլխի վերևում կախեք այնպես, որ ձեռքերով չկարողանա հասնել նրան։ Երեխան պետք է թռչկոտի և փորձի ձեռքով դիպչել փուչիկին։ Ի դեպ, փուչիկի մեջ կարելի է, օրինակ, պենոպլաստ լցնել, որպեսզի փուչիկի շարժման ընթացքում 
տեղաշարժվի։
«Քայլիր ինչպես արջուկը»
Առաջարկեք երեխային տարբեր կենդանիների քայլքով քայլել. օրինակ ինչպես արջուկ՝ ձեռքերն ու ոտքերն իրարից հեռու դրված, ինչպես նապաստակ՝ թռկչոտելով, ինչպես ձիուկ՝ ոտքերը բարձրացնելով, ինչպես զինվոր՝ զինվորական քայլքով։ Քայլեք ոտնաթաթերի վրա, կրունկների վրա, վազեք, ծիտիկների նման թռկոտեք՝ թևերը կողքեր տարածած թափահարելով։
«Թռիր-անցիր»
Հատակին դրեք երկար թել կամ խաղալու օղ։ Երեխային ցույց տվեք ինչպես թռչկոտելով անցնել դրանց վրայով։
«Կատու և ճուտիկ»
Դուք ձևացրեք քնած կատվի, իսկ փոքրիկը կլինի ճուտիկը։ Երբ կատուն արթնանում է, վազում է ճուտիկի հետևից՝ փորձելով բռնել նրան։ Իսկ ճուտիկը փախչում է դեպի իր տնակը, օրինակ նստում աթոռակի վրա կամ թաքնվում սեղանի տակ։
«Անցիր թունելներով»
Իրարից ոչ շատ մեծ հեռավորության վրա դրվում են աթոռներ։ Երեխան պետք է սողալով անցնի դրանց տակով, իսկ մայրիկը փորձի բռնել նրան։ Կարելի է աթոռների արանքում դնել ուրիշ խաղալիքներ, բարձեր, որոնց փոքրիկը պետք է շրջանցի։
«Արագիլ և ծիծեռնակ»
Հավասարակշռությունը պահել սովորելու համար երեխային առաջարկեք կանգնել մեկ ոտքի վրա ինչպես արագիլ։ Ապա փոքրիկը թող ոտքը հետ տանի և մարմինը փոքր-ինչ դեպի առաջ թեքի։ Կդառնա ծիծեռնակ։
