Հինգ պարզ խորհուրդ գիրք չսիրող փոքրիկների ծնողների համար

1. Երբեք մի՛ ստիպեք երեխային գիրք կարդալ, քանի որ երեխաների համար այն պետք է ընկալվի որպես պարգև, մեծ արժեք, և ոչ թե՝ պարտականություն: Ի՞նչ եք կարծում, ի՞նչ կլինի այն դեպքում, երբ երեխային պարբերաբար ստիպեք պաղպաղակ ուտել, որքա՞ն շուտ նա այդ ամենից կհոգնի:
2. Գտեք այն գրքերը, հերոսները կամ ժանրերը, որոնք Ձեր երեխայի համար առավել հետաքրքիր կլինեն: Օրինակ, եթե Ձեր երեխան հետաքրքրվում է ընտանի կենդանիներով, ապա գնեք գրքեր հենց կենդանիների մասին:
3. Կարևոր է, որ երեխան շրջապատված լինի գիրք, թերթ կամ ամսագիր կարդացող հարազատներով, քանի որ երեխաները սիրում են մեծերին ընդօրինակել: Կարևոր է նաև այն, որ երեխան հենց Ձեր ձեռքին տեսնի այն գիրքը, որն իրեն կարող է հետաքրքրել:
4. Երեխայի ներկայությամբ՝ ընկերներին կամ հարազատներին անկեղծորեն, առանց չափազանցելու, պատմեք վերջերս ընթերցված որևէ գրքի մասին: Ասեք նաև, որ ցանկանում եք այդ գրքի մասին պատմել երեխային հարազատ որևէ մեկին, քանի որ վստահ եք, որ նա կհավանի այդ գիրքը: Բավական է անգամ նման պատահական և կարճ արտահայտությունն էլ, որպեսզի երեխայի ուշադրությունը կենտրոնացվի այդ գրքի վրա:
5. Երեխայի ընկերների ծնողներից հետաքրքրվեք, թե ինչ գրքեր են սիրում կարդալ նրանց երեխաները: Երբեմն ընկերների կարծիքն ավելի կարևոր է լինում, քան ծնողների խորհուրդները:

Պատրաստեց՝  Նարին Մուրադյանը
(«Այբ Բեն Գիմ» զարգացման ակումբի էրգոթերապիստ,
հատուկ հոգեբան)

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։