Հեքիաթները երեխաների կյանքում

Հեքիաթների դերը երեխաների կյանքում բազմազան է. դրանք զարգացնում են երևակայությունը, մտածողությունն ու նույնիսկ ճիշտ խոսքը: Դեռ հին դարերից հեքիաթները մնում են յուրաքանչյուր երեխայի դաստիարակման անբաժան մասը: Հեքիաթներն օգնում են ծնողներին մատչելի լեզվով երեխային ծանոթացնել կյանքին, ծանոթացնում են չարի և բարու հետ: Հեքիաթներն երեխաների համար ավելի հասկանալի են, քան մեծահասակների բարդ ու խճճված զրույցները: Այդ իսկ պատճառով, երեխաներին որևէ բան բացատրելու համար, ծնողները դիմում են հեքիաթների օգնությանը: Երեխաների կյանքում հեքիաթը շատ կարևոր տեղ է զբաղեցնում: Նրա օգնությամբ երեխաները սկսում են վաղ խոսել և իրենց մտքերը ճիշտ ու գրագետ արտահայտել: Հեքիաթները նաև նպաստում են լավ վարքի դրսևորմանը, այլ անձանց հետ շփման կարողությանը:
Երեխաների համար հեքիաթները պետք է ընթերցել «ճիշտ» ժամանակ, երբ նրանք հանգիստ են և լավ տրամադրություն ունեն: Հեքիաթի ամենալավ ժամանակը քնից առաջ ընկած ժամանակահատվածն է, երբ երեխան հանգիստ պառկած է տաք անկողնում և հնարավորություն կա միասին քննարկել հեքիաթը: Հեքիաթը պետք է կարդալ հանգիստ, կենտրոնացած և հաճույքով: Այդպիսի ընթերցանությունը երեխային ավելի շատ դրական էներգիա կփոխանցի և ավելի օգտակար կլինի:
Հեքիաթի դերը երեխայի դաստիարակության գործում անհնար է չնկատելը: Երեխաները սովորում են հասկանալ հերոսների ներաշխարհը, վերապրել նրանց անցած ուղին: Սովորում են հավատալ բարու ուժին: Հեքիաթների շնորհիվ կարելի է ոչ միայն հետաքրքիր ու օգտակար ժամանակ անց կացնել, այլ նաև երեխայի անհանգստությունը վերացնել:
Հեքիաթն օգնում է հարստացնել երեխայի բառապաշարը, ինչպես նաև խթանում կապակցված խոսքը: Հեքիաթի շնորհիվ երեխայի խոսքը դառնում է ավելի զգայական ու գեղեցիկ: Այս կախարդական պատմությունները ձևավորում են հարցեր տալու ունակությունը, բառակապակցություններ ու նախադասություններ կազմելու հմտությունը:
Երեխաների կյանքում հեքիաթների կարևորագույն դերերից մեկն այն է, որ այնտեղ միշտ բարին է հաղթում: Հետագայում դա երեխային կօգնի սովորել հաղթահարել կյանքի դժվարությունները:
Կյանքն, իհարկե, իր ուղղումները կմտցնի, բայց, այնուամենայնիվ, երեխայի ենթագիտակցության մեջ ոչինչ չի կորում:
Միևնույն հեքիաթը կարելի է և պետք է կարդալ մի քանի անգամ: Դա կնպաստի, որ երեխան ճիշտ ըմբռնի հեքիաթում ներդրված իմաստը: Որպես կանոն, երբ երեխան ամբողջությամբ ընկալում է հեքիաթի իմաստը, նրա հետաքրքրությունը կորում է դրա նկատմամբ: Բացի այդ, յուրաքանչյուր երեխա հեքիաթի մեջ գտնում է այն, ինչն իրեն հետաքրքիր է:

Հեքիաթ ընթերցելիս խորհուրդ է տրվում նախ ծանոթնալ նրա բովանդակությանը (եթե անծանոթ հեքիաթ է), ապա այն ձևափոխել տվյալ տարիքային խմբին համապատասխան տերմիններով, դաժան հատվածները ձևափոխել և այլն։

3 տարեկան փոքրիկների մոտ բովանդակալից-դերային խաղերի կարիք է առաջանում։ Ցանկալի է, որ այդ տարիքում երեխաների հետ փորձեք բեմականացնել արդեն կարդացված հեքիաթները։ Դա կարող է լինել օրինակ սեղանի թատրոն (թղթից կտրատել հերոսներին, դեկորացիաները և այլն)։ 4-5 տարեկան երեխաների հետ կարելի է հորինել սեփական հեքիաթները և դրանք բեմականացնել, հագնելով բեմական հագուստներ, ընտրելով համապատասխան երաժշտություն, դիմելով գրիմի օգնությանը։

Հեքիաթը յուրաքանչյուր փոքրիկի լիարժեք զարգացման ամենամատչելի տարբերակներից մեկն է: Այդպես եղել է, կա ու կլինի: Պետք չէ թերագնահատել հեքիաթի դերը երեխայի կյանքում: Ճիշտ ընտրած հեքիաթը դրական ազդեցություն կթողնի երեխայի հուզական ներաշխարհի վրա, կուղղի և կլավացնի նրա պահվածքը, ինչպես նաև կզարգացնի սեփական անձի և ուժերի նկատմամբ հավատը:

Սիրելի այցելու, եթե դու այլևս ՓՈՔՐԻԿ չես, այլ ՊԱՏԱՆԻ, եթե արդեն քո հետաքրքրությունների շրջանակն ընդլայնվել է և դու ուզում ես տարիքիդ համապատասխան հետաքրքիր հոդվածներ կարդալ, ապա «Պատանի եմ» կայքը հենց այն հարթակն է, որը կհագեցնի քո հետաքրքրասիրությունները։ Այստեղ դու կարող ես նաև ինքդ լինել հեղինակ, ունենալ ու վարել քո բլոգային էջը։ Միացի՛ր պատանիների թիմին։ Դարձի՛ր «Պատանի եմ» կայքի մի մասնիկը։