Ի՞նչ խմբակ ընտրել երեխայի համար

Մեկուկես-երկու տարեկանից երեխաներն արդեն հաճախում են զարգացման կենտրոններ, որտեղ նրանք խաղում են, շփվում այլ երեխաների հետ, գիտելիքներ ստանում ու փորձ ձեռք բերում։ Այս կենտրոններում, որպես կանոն, հիմնական ուշադրությունը բևեռված է փոքրիկների բազմակողմանի զարգացմանը։

Ինչքան երեխան մեծանում է, այնքան ավելի խորը, ծավալուն գիտելիքների է ձգտում։ Այդ իսկ պատճառով անհրաժեշտություն է առաջանում երեխայի հետագա զարգացման մեկ-երկու ճյուղ ընտրել։ Ընդ որում, պետք է հաշվի առնել երեխայի ցանկություններն ու հետաքրքրությունները։ Ակտիվ երեխաներին «կսազի» պարի խմբակներն ու լողը, իսկ նկարել սիրող երեխաներին՝ ստեղծագործական խմբակները։

Ընդհանրապես, երեխաներին բավարար են ընդամենը 3 տարբեր ուղղվածություն ունեցող խմբակներ, օրինակ՝ երաժշտություն կամ նկարչություն (էսթետիկ զարգացում), ֆուտբոլ կամ լող (ֆիզիկական զարգացում), օտար լեզու կամ շախմատ (մտավոր զարգացում)։ Այսպիսի տարբեր ուղղվածության պարապմնունքները երեխային հնարավորություն են տալիս զարգանալ համաչափ ու ամբողջական։ Իսկ դրանց տարբերությունը փոքրիկին հնարավորություն կտա ընտրել այն ուղղությունը, որին հետագայում նա կհետևի։

Եթե երեխան, մի քանի անգամ հաճախելով որևէ խմբակ, հրաժարվում է հետագա այցերից, մի ստիպեք։ Միգուցե դա նրա կոչումը չէ կամ ինչ-որ բան նրան դուր չի գալիս։ Ցանկացած դեպքում ստիպողաբար խմբակի հաճախելը տհաճ կլինի թե Ձեզ և թե ձեր երեխային։

Այսպիսով, երեխային որևէ խմբակ տանելուց, ծնողները հետևյալ նպատակներն ունեն.

– Երեխայի զարգացում,
– Ժամանցի կազմակերպում,
– Շրջապատի ընդլայնում,
– Միջավայրի փոփոխություն,
– Ինքնուրույնության և պատասխանատվության դաստիարակում։

Նկարչություն (սկսած 3 տարեկանից)
Նկարչությունը զարգացնում է ստեղծագործական հնարավորությունները, երևակայությունը, զգայականությունը, մտածողությունը, ուշադրությունը, մանր մոտորիկան, ձեռքերի կոորդինացիան, ճաշակը և, իհարկե, գեղարվեստական ունակությունները։ Երեխան դառնում է նստակյաց, համբերատար և սովորում է կենտրոնանալ։

Ծեփ (սկսած 3 տարեկանից)
Պլաստիլինից, խմորից, կավից ծեփը զարգացնում է մանր մոտորիկան, աչքաչափը, նստակյացությունը, ստիպում սկսած աշխատանքն ավարտին հասցնել, ծանոթացնում է ճկուն զանգվածներին, հետաքրքրություն է ձևավորում ծեփի հանդեպ։

Երաժշտություն (սկսած 3 տարեկանից)
Երաժշտական խմբակները սեր են առաջացնում երգեցողության նկատամամբ, զարգացնում են ռիթմի, լսողության զգացողությունները և ձայնը։ Պարապմունքների ընթացքում երեխայի մոտ զարգանում է ուշադրությունը։ Համերգները երեխաներին ուսուցանում են ներկայանալի դառնալ ծնողներին և ինքնավստահություն ձեռք բերել։

Թատերական խմբակներ (սկսած 4 տարեկանից)
Թատերական խմբակներում երեխաները բացվում են, լրիվ այլ կերպար են ընդունում։ Նրանք սովորում են արտահայտել իրենց մտքերն ու զգացմունքները, գեղեցիկ արտահայտվել, ճկուն շարժվել։ Զարգանում է հիշողությունը, զգացմունքայնությունը և այլ մարդկանց ավելի լավ հասկանալու ունակությունը։ Երեխան սկսում է հաճույք ստանալ բեմում ելույթներից։

Օտար լեզվի խմբակներ (սկսած 4 տարեկանից)
Այս խմբակներում երեխաները սովորում են օտարալեզու երգեր ու բանաստեղծություններ, ծանոթանում են լեզվի հիմքին ու արտասանության կանոններին, ձեռք են բերում արտահայտվելու հմտություններ։

Շախմատ և շաշկի (սկսած 5 տարեկանից)
Երեխաները ծանոթանում են շախմատ ու շաշկի խաղերի օրենքներին, խաղերում հմտություններ ձեռք բերում, սովորում են շախմատային խնդիրներ լուծել։ Շախմատն ու շաշկին զարգացնում են երեխայի տրամաբանական մտածողությունն ու բարձրացնում են ինտելեկտի մակարդակը։