Ձմեռ է։ Գետակները, լճակներն ու ջրափոսերը սառույցով են պատվել։ Դու, իհարկե, սիրում ես սահել… Զգույշ եղիր։ Արտաքնապես ամուր սառույցը կարող է շատ վտանգավոր լինել։ Իսկ ինչպե՞ս խուսափել վտանգից։ Ուշադիր կարդա հոդվածը.
Միշտ ուշադրություն դարձրու, թե ինչ գույն է սառույցը։ Եթե այն կանաչավուն կամ կապտավուն է, ապա նրա հաստությունը 10-12սմ է։ Այդպիսի սառույցը շատ ամուր է։ Իսկ եթե սառույցը խամրած սպիտակ է՝ դեղնավուն երանգով, ապա այն անկայուն, բարակ շերտ է։ Դրա վրա քայլել չի՛ կարելի։
Հիշիր, վտանգավոր է սառույցի վրայով քայլելը հալոցի ժամանակ կամ ձյան շերտով ծածկվելու դեպքում։
Եթե անհրաժեշտ է սառած գետակի վրայով անցնել, ապա նախ և առաջ սառույցի ամրությունը ստուգիր ձեռնափայտով նրան հարվածելով։ Եթե հարվածից հետո ջուր է հայտնվում, ապա շրջանցիր այդ հատվածը, սառույցը ամուր չէ։
Իսկ եթե բախտի բերմամբ դու սառույցի կենտրոնում ես, ու սառույցը ոտքերիդ տակ ճաքել է, և դու կիսով չափ ընկել ես սառցաջրի մեջ կամ սառույցի վրա, խուճապի մի՛ մատնվիր ու ձեռքերդ մի՛ թափահարիր։ Պետք է հետ վերադառնալ դեպի այն կողմը, որտեղից եկել ես։ Դրա համար զգուշորեն սողա՝ ձեռքերդ լայն բացելով։ Մի փորձիր կանգնել սառույցի վրա։ Հեռու սահիր ճաքերից և նոր ոտքի կանգնիր։ Արագ վազիր, որպեսզի տաքանաս և շուտ տաք տեղ հասնես։
Իսկ եթե դու տեսել ես մարդու, ով սառույցի տակ է անցել, ապա բարձրաձայն գոռա, օգնություն կանչիր։ Սառույցի ճեղքին մոտենալ չի՛ կարելի, այլ միայն կարելի է մոտ սողալ որևէ տախտակի կամ դահուկների վրա պառկելով։ Երբեք խեղդվողին ձեռք մի՛ մեկնիր, կարող ես դու էլ հետը հայտնվել ջրի տակ։ Պետք է խեղդվողին մեկնել որևէ տախտակ, դահուկի ձող, թել և այլն։ Կարելի է այդ նպատակով օգտագործել երկար շարֆը կամ վերնազգեստը՝ վերարկուն կամ բաճկոնը։
Սառցաջրի մեջ հայտնված մարդը սառչում է, նրա հագուստը թրջվում է և նրան քաշում է դեպի ջրի հատակը ու նա շատ արագ կորցնում է իր ուժերը։ Այդ պատճառով փրկարարը պետք է զգուշորեն, բայց վստահաբար ու քաջությամբ գործի։
