Հսկա գիշատիչ կոկորդիլոսներն են երկրագնդի ամենահին բնակիչները։ Նրանք վարում են երկկենցաղ կյանք։ Երկրագնդի վրա կա կոկորդիլոսների 21 տեսակ։ Նրանք ապրում են ջրային տարածքների ափամերձ հատվածներում։ Սակայն կան որոշ կոկորդիլոսներ, որոնց բնակության վայրը բաց ծովն է։
Գոյություն ունի կոկորդիլոսների 3 ընտանիք՝ ալիգատորներ, իսկական կոկորդիլոսներ և գավիալներ։
Ալիգատորների մռութը կարճ ու լայն է։ Ամենաեզակի տեսակներից մեկը չինական ալիգատորն է։ Հաշվարկվում է ընդամենը 1000 հատ այդպիսի ալիգատոր։
Իսկական կոկորդիլոսներն ունեն ավելի նեղ ու երկար մռութ, քան ալիգատորները։ Այս կոկորդիլոսների ընդամենը 13 տեսակ կա։ Դրանցից ամենահայտնին նեղոսյան կոկորդիլոսն է։ Սրանց խոշոր տեսակները կարող են հարձակվել նույնիսկ այնպիսի խոշոր կենդանիների վրա, ինչպիսին է ռնգեղջյուրը։
Գավիալները խոշոր կենդանիներ են (սրանց երկարությունը երբեմն հասնում է մինչև 6մ), ունեն բավականին նեղ ու երկար ծնոտներ։ Մյուս տեսակների համեմատ, սրանք մարդկանց համար վտանգավոր չեն, քանի որ հիմնականում սնվում են ձկներով։
