Մոտենում է Նոր տարին ու Սուրբ ծնունդը՝ երեխաների համար հրաշքների ժամանակաշրջանը։ Իսկ դու սիրո՞ւմ ես հեքիաներ ու հրաշքներ։ Ուրեմն այս դասը քեզ համար է։ Եվ այսպես…
Կարծում եմ, փոքրիկ ընկեր, դու չես վախենում չար կախարդներից։ Իսկ ինչո՞ւ վախենալ, եթե բոլոր տղաներն ու աղջիկները գիտեն, որ հեքիաթներում միշտ բարին է հաղթում։ Ի դեպ, հրաշագործները ապրում են ոչ միայն հեքիաթներում։
Յուրաքանչյուր բարի մարդ, ով արդար է, ձգտումներ ունի ու իր աշխատանքը սիրով է կատարում, հրաշագործ է։
Ազնիվ հեքիաթային խոսք…
Մի՞թե հրաշք չէ դատարկ տարածքում մի քանի ամսվա ընթացքում գեղեցիկ տուն կառուցելը։ Իսկ հիվանդ մարդուն բժշկե՞լը, կամ այգի աճեցնե՞լը։ Իսկ համեղ թխվածք պատրաստե՞լը…
Այո՜… Մեր շրջապատում ոչ հեքիաթային հրաշագործները շա՜տ շատ են։ Իհարկե, դու ուզում ես շատ բաներ սովորել քո շրջապատի հրաշագործներից։ Չէ՞ որ դու դեռ չես կարող ինքնուրույն հրաշքներ գործել։
Չնայած… կարծես թե, այստեղ ես սխալվեցի։ Թեև դու դեռ տարիքով մեծ չես, բայց քո շրջապատում կան գործեր, որոնք կարող ես և դու անել։ Այդ ամենը կախված է քո ցանկությունից ու ձգտումից։ Եվ ես, իհարկե, հավատում եմ, որ դու չես ծուլանա և օրական գոնե մեկ բարի հրաշք կիրագործես։
Առաջադրանք 1.
Մայրիկից կամ տատիկից խնդրիր փոքրիկ տաշտակ։ Մի քիչ տաք ջուր լցրու մեջը։ Գտիր այն լաթը, որով սովորաբար մայրիկը տան հատակն է լվանում։ Այն մտցրու ջրով լի տաշտակի մեջ, ապա զգուշորեն քամիր։ Եվ խոնավ լաթով մանրամասն մաքրիր խոհանոցի հատակը։ Մաքրելու ընթացքում մի քանի անգամ լաթը լվա տաք ջրի մեջ և քամիր։ Չմոռանաս սրբել անկյունները, սեղանի ու աթոռների տակ։ Վերջացնելով գործը անպայման լվա լաթը և այն կախիր չորանալու։
Առաջադրանք 2.
Օգնիր քո փոքր քույրիկին կամ եղբորը հագնել հագուստը, կոշիկները։ Զբոսնիր նրանց հետ, անհրաժեշտության դեպքում՝ շիլա կերակրիր։
Առաջադրանք 3.
Ծիտիկների համար կերակրատախտակ պատրաստիր, չէ՞ որ ձմեռ է և նրանք հիմա ուտելիք դժվարությամբ են գտնում։ Չմոռանաս պարբերաբար կեր լցնել այդ կերակրատախտակի վրա։
Ինքդ որոշիր, թե էլ ի՞նչ հրաշքներ կարող ես գործել։ Անհրաժեշտության դեպքում դիմիր մայրիկին, հայրիկին կամ քեզնից մեծ եղբորն ու քրոջը։ Ու հիշրի, հրաշագործ լինելու համար պետք չէ գտնվել հեքիաթում։
