Անպետք թելերից պատրաստենք շնիկ։

Անհրաժեշտ են.
Հին գործվածքներից քանդված միագույն թելեր, 2 սև հուլունք և մկրատ։

1. Թելերից գունդ պատրաստեեք։ Այդ գնդի մի փոքրիկ հատված ձեռքերով ձգեք՝ ձևավորելուվ օվալաձև գլուխը, բայց այն չառանձնանցելով ընդհանուր գնդից։

2. Միագույն, բայց հարթ թելով մի քանի անգամ փաթաթեք վզի հատվածը՝ առանց թելը ձգելու։ Նման ձևով փաթաթեք շան քթի հատվածը։

3. Հարթ թելով փաթաթեք շան մարմնի կենտրոնական հատվածը՝ ձևավորելով մարմնի կորությունը։

4. Մարմնի երկու կողմերից թելի գնդերը երկայնական ուղղությամբ բաժանեք 2 մասերի և դրանք թելերով փաթաթեք՝ ստանալով շան ոտքերը։

5. Հետևի ոտքերի մոտ մի քանի թել դուրս քաշեք դեպի վեր և թելով փաթաթելով ստացեք պոչը։

6. Գլխի վերին հատվածում երկու փոքր ու համաչափ գնդեր թելերով փաթաթելով ստացեք ականջները։

7. 2 սև հուլունքները ամրացրեք շան գլխին՝ աչքերի հատվածում։

Շունը պատրաստ է։

Խորհուրդ. որպեսզի պատրաստվածքը ամուր լինի և ձևը չկորցնի, այն մի քանի անգամ առանց ամուր ձգելու կարեք նույն գույնի թելով՝ դուրս մնացած թելիկները կոկիկ հավաքելով մարմնի վրա։

Անպետք ձեռնոցից պատրաստենք շնիկ։

Անհրաժեշտ են՝ ձեռնոց, թել-ասեղ, ներկեր, սոսինձ, գունավոր թուղթ, մորթե կտոր, կարմիր կտոր, բամբակ, մկրատ։

Ձեռնոցի վերին մակերեսին գուաշով նկարենք սև կետեր, ներկենք ցուցամատի և ճկույթի մի մասը։ Մի քանի կարով իրար ամրացնենք միջնամատն ու մատնեմատը։

Միջնամատի և մատնեմատի վրա սոսնձի օգնությամբ կպցնենք թղթից պատրաստված աչքերն ու բամբակից պատրաստված ունքերն ու դունչը։

Մորթե կտորից կտրենք ականջներն ու պաչը, իսկ կարմիր կտորից՝ լեզուն։

Ականջները, պոչն ու լեզուն կարենք ձեռնոցի համապատասխան տեղերում։

Հագնենք ձեռնոցը՝ ցուցամատն ու ճկույթը առաջ բերելով (որպես ոտքեր), իսկ միջնամատն ու մատնեմատը բութ մատի օգնությամբ ծալելով դեպի ափը։

Միասին սովորենք նկարել փոքրիկ շնիկ։Շնիկ նկարելու համար անհրաժեշտ է սպիտակ թուղթ, սև հասարակ մատիտ, գունավոր մատիտներ և ռետին։

Սև հասարակ մատիտի օգնությամբ ուրվագծում ենք շնիկի հիմնական եզրագծերը և տանում դեմքի համաչափության առանցքը.

Գլխի վրա նկարում ենք ականջներն ու աչքերը.

Հաջորդ քայլում վերջնական տեսքի ենք բերում աչքերն ու ականջը, նկարում մռութը և մարմնի հիմնական գծերը.

Ներկում ենք աչքերը, նկարում լեզուն և թաթերն ու պոչը։

Ռետինի օգնությամբ մաքրում ենք բոլոր օգնական գծերը։ Շնիկը պատրաստ է։ 

Այն կարելի է ներկել ցանկացած գույն, ինչպես նաև վրան սև կետեր նկարելով ստանալ հայտնի «101 դալմատացիներ» մուլտֆիլմի փոքրիկ շնիկներից մեկին։

Երկրաչափական պատկերներից պատրաստենք շնիկ։ 

Անհրաժեշտ են՝ գունավոր կամ սպիտակ թուղթ, մատիտներ, մկրատ, սոսինձ։

Շագանակագույն թղթի երանգներից կտրատում ենք հետևյալ դետալները, կամ նույն դետալները պատրաստում ենք սպիտակ թղթից և ներկում մեր ցանկացած գույներով։ Գծիկավոր գծերը կտրման գծեր են։

Հետևելով նկարում բերված հերթականությանը, հատվածները սոսնձում ենք սպիտակ թղթի վրա.

Սև մատիտով նկարում ենք մռութը։
Շնիկը պատրաստ է.