Արհեստական ձյուն մեր ձեռքերով
Արհեստական ձյունը ամանորի զարդերի գեղեցիկ տարրերից մեկն է և տոնական անկրկնելի տրամադրություն է առաջացնում։
Ձեզ ենք ներկայացնում արհեստական ձյուն ստանալու մի քանի տարբերակներ.
Պենոպլաստից կամ փաթեթավորման պոլիէթիլենից ստացված ձյուն
Այսպիսի ձյունը հարմար է տոնածառների, խաղալիքների նոր տարվա կոմպոզիցիաների զարդարման համար։ Այսպիսի ձյուն ստանալու համար պենոպլաստը կամ փաթեթավորման համար նախատեսված պոլիէթիլենի շերտը պարզապես անհրաժեշտ է անցկացնել մանր քերիչով։
Պարաֆինից և տալկից ստացված ձյուն
Ամենասովորական սպիտակ մոմի միջոցով կարելի է ստանալ գեղեցիկ ձյուն։ Անհրաժեշտ է զգուշորեն հանել մոմի պատրույգը և պարաֆինն անցկացնել մանր քերիչով։ Այնուհետև պետք է այդ զանգվածին ավելացնել փոքր տալկ և լավ խառնել։
Ձյուն տակդիրներից
Արհեստական ձյան հետաքրքիր տարբերակ է դրա ստացումը մանկական տակդիրներից։ Այն բավականին նման է իսկական ձյանը, այդ իսկ պատճառով այս ձյունը կարելի է օգտագործել ոչ միայն որպես դեկորատիվ միջոց, այլ նաև խաղերի համար։ Սրանից հեշտությամբ կարելի է պատրաստել ձնեմարդ, ձնագնդիկ խաղալ և այլն։
Պատրաստելու համար անհրաժեշտ է մի քանի տակդիրի ներքին պարունակություն դատարկել որևէ տարայի մեջ, ապա դրա վրա ավելացնել 1 բաժակ ջուր։ Պետք է թողնել, որպեսզի ջուրը ներծծվի զանգածի մեջ։ Եթե ստացված ձյունը չոր լինի, ապա կարելի է մի քիչ էլ ջուր ավելացնել և էլի թողնել, որ ջուրը ներծծվի։ Այս գործողությունը կրկնեք այնքան, մինչև ստանաք ձնանման զանգված։ Զգուշացեք ավել ջուր լցնելուց, այլապես ձյունը ջրիկ կստացվի։ Զանգվածը պատրաստելուց հետո մեկ-երկու ժամ այն թողեք, որպեսզի ամբողջովին ներծծվի ջուրը։ Ստացված զանգվածը կարելի է դնել սառնարանը և այն ավելի նման կլինի ձյանը։
Ձյուն զուգարանի թղթից
Այս տեխնիկայով պատրաստված ձյունը հարմար է ծեփի համար։
Պատրաստելու համար անհրաժեշտ է 1-2 փաթեթ զուգարանի թուղթը մանրացնել միկրոալիքային վառարանի համար նախատեսված ամանի 
մեջ, ապա դրա մեջ դնել ամենահասարակ սպիտակ օճառ։ Այն պետք է տեղադրել միկրոալիքային վառարանի մեջ մեկ րոպե տևողությամբ։ Ընթացքում անհրաժեշտ է պարբերաբար հետևել զանգվածի բաղադրությանը։ Տաքանալուց հետո զանգվածը ուռչում և փխրուն է դառնում։ Դրա վրա ավելացրեք մեկ բաժակ ջուր և խառնեք։ Եթե ձյունը չոր ստացվի, ապա ավելացրեք մի փոքր ջուր ևս։
Ձյուն կերակրի սոդայից և սափրվելու փրփուրից
1 տուփ կերակրի սոդան աստիճանաբար խառնել փրփուրի հետ։ Կարելի է ավելացնել մի փոքր փայլ։
Եղյամով պատված ճյուղեր
Եղյամով պատված սպիտակ ճյուղերը նոր տարվա զարդերի մեջ ամենագեղեցիկներից են։ Տնային պայմաններում նման ճյուղեր պատրաստելու համար անհրաժեշտ է մեծ կաթսայի մեջ լցնել մոտ 2 լիտր ջուր և այն եռացնել։ Եռալուց հետո ջրի մեջ ավելացնել 1 կգ խոշոր աղ և սպասել մինչև աղն ամբողջությամբ լուծվի, ապա գազօջախն անջատել։ Եռման լուծույթի մեջ դրեք չոր ճյուղերը և սպասեք մինչև լուծույթը սառչի։ Այնուհետև ճյուղերը հանեք և թողեք չորանան։ Նման եղանակով կարելի է նախշազարդել ոչ միայն ճյուղերը, այլ նաև ցանկացած իր, օրինակ՝ տոնածառի խաղալիքները։