Ապակյա տարաների կափարիչներից կարելի է ստանալ բավական գեղեցիկ տոնածառի խաղալիք։ Այս հոդվածում միասին կպատրաստենք նմանատիպ մի խաղալիք։ Խաղալիքը պատրաստելու համար անհրաժեշտ են. ապակյա տարայի կափարիչ, ամանորի թեմայով անձեռոցիկ, սոսինձ, բամբակ, փայլ և ներկեր։
Վերցնում ենք կափարիչը, այն զգուշությամբ մի անկյունից ծակում։ Ներսի մակերեսը ծածկում ենք սոսնձի շերտով և նախօրոք նրա չափով կտրած սպիտակ անձեռոցիկ կպցնում։
Անձեռոցիկի չորանալուց հետո վրան սոսնձում ենք տոնական նկարով անձեռոցիկի կտորը։
Ներսի կողմից եզրերին սոսինձ ենք քսում և բամբակով պատում։
Նկարի մակերեսին թեթևակի սոսինձ ենք քսում և վրան շատ քիչ փայլ շաղ տալիս։
Կափարիչի արտաքին եզրին ևս սոսինձ ենք քսում և բամբակով պատում։
Կափարիչը շուռ ենք տալիս հակառակ կողմ և հակառակ կողմից ևս սպիտակ անձեռոցիկ փակցնում։
Արդեն այս կողմի վրա կարելի է երևակայությամբ ներկերով նկարել կամ նախշազարդել ըստ ցանկության։ Տվյալ դեպքում եզրերին բարակ սոսինձ է քսվել և վրան փայլ լցվել, ապա կենտրոնում տոնածառի ուրվագիծ սոսնձով նկարվել և փայլի օգնությամբ այն դարձել է փայլուն տոնածառ։
Չմոռանաք նախօրոք բացած անցքի մեջ թել անցկացնել՝ խաղալիքը կախելու համար.
