Որևէ տոնի սպասելը երեխայի համար տոնի նման հետաքրքիր ու կարևոր երևույթ է։ Այդ սպասումը կարելի է գեղեցիկ դարձնել, պատրաստելով հետաքրքիր օրացույց։ Օրացույցն իրենից ներկայացնելու է սովորական «պոկվող օրացույց»-ին համարժեք օրացույց։ Յուրաքանչյուր օրվա նշանի տակ թաքնված է լինելու որևէ կոնֆետ կամ կինդեր-ձվիկի փոքրիկ խաղալիք։ Եվ երեխան յուրաքանչյուր օր մկրատի օգնությամբ հեռացնելուց որպես անակնկալ ստանալու է թաքնված նվերը։
Այդպիսի օրացույցի պատրաստման համար անհրաժեշտ է՝ հաստ թուղթ, գունավոր ստվարաթուղթ (կամ հասարակ թուղթ և գունանյութ), գունավոր անթափանց սկոտչ, մկրատ, մատիտ (որը կծառայի օրացույցի պատից կախվելու հիմք), թել։
1. Հաստ թղթից 7-8սմ լայնությամբ երիզ կտրեք (երիզը պետք է սկոտչից ավելի լայն լինի)։ Երիզի երկարությունը կախված է լինելու սպասվող օրերի քանակից։ Ենթադրենք տոնին երեխան սպասելու է մոտ մեկ ամիս։ Այդ դեպքում թղթի երկարությունը կլինի մոտ 1.5 մետր։
2. Պատրաստեք օրերի քանակին համապատասխան խրախուսիչ մանր նվերներ՝ կոնֆետներ, խաղալիքներ կինդեր-ձվիկների միջից, այլ մանր խաղալիքներ, որոնք սակայն, չեն վնասվի սկոտչի հետ շփումից (այլապես դրանք անհրաժեշտ է փաթաթել այլ թղթի կամ փայլաթիթեղի մեջ)։
3. Որևէ հարթ մակերեսի վրա բացեք անհրաժեշտ երկարության գունավոր, անթափանց սկոտչը։ Դրա վրա հավասար հեռավորություններով դասավորեք նվերները։ Հեռավորությունը պիտի լինի այնպիսին, որ հնարավոր լինի մեկը մյուսից անվնաս կտրել նվերով կտորները։
4. Թղթե երիզն ու սկոտչը պետք է կպցնել իրար։ Ստացվում է, որ նվերները հայտնվում են այդ երկու երիզների միջև։
5. Այժմ օրերի հերթն է։ Դրանք կարելի է գրել անմիջապես թղթե երիզի վրա կամ գեղեցիկ ստվարաթղթե ձևերի վրա պատրաստել և սոսնձել թղթե երիզին այն կետերում, որտեղ թաքնված են նվերները։
Օրացույցը պատրաստ է։ Մնում է միայն մատիտը ամրացնել օրացույցի վերին հատվածում, մատիտի ծայրերից թել կապել և այն կախել պատից։
