Արևը սովորական աստղ է։ Այն իրենից ներկայացնում է շիկացած գազից գունդ, որի ներսում մշտապես ատոմային ռեակցիաներ են տեղի ունենում։ Հենց դրա պատճառով էլ այդ տիեզերական մարմինը մեծ քանակությամբ լույս ու ջերմություն է արտադրում։ Հենց արեգակի շնորհիվ ենք մենք ապրում, չէ՞ որ արևն իր ջերմությամբ տաքացնում է մեր մոլորակը։ Եթե արևը չլիներ, Երկրագունդը հավերժական խավարի մեջ կլիներ, այստեղ միշտ խիստ սառնամանիք կլիներ ու կյանքի ոչ մի նշույլ չէր լինի։
Ե՞րբ և ինչպե՞ս է առաջացել արևը
Մոտավորապես 5 միլարդ տարի առաջ մեր գալակտիկայի փոշե-գազային ամպերից մեկը ահռելի չափերի հասավ ու սկսեց իր առանցքի շուրջ պտտվել։ Այդ ընթացքում ամպն անընդհատ սեղմվում ու ընդարձակվում էր։ Նրա կազմող մասնիկներն անընդհատ իրար էին հարվածում, որի պատճառով էլ ջերմություն էր առաջանում։ Միլիոնավոր տարիներ ամպը տաքացավ այդպես ու ի վերջո վերածվեց հրե գնդի։ Այսպես 4 միլիարդ 500 միլիոն տարի առաջ առաջացավ արևը։
Արևը բաղկացած է ջրածնից (իր զանգվածի 73% և ծավալի 92%), հելիումից (զանգվածի 25% և ծավալի 7%) և այլ նյութերից՝ քիչ քանակությամբ (երկաթ, նիկել, ազոտ, թթվածին, ծծումբ և այլն)։
Արևն իր չափերով չի գերազանցում սովորական միջին աստղերի չափ է։ Մեր մոլորակի հետ համեմատած այն իսկական հսկա է։ Արեգակի զանգվածը 333 հազար անգամ գերազանցում է Երկրի զանգվածին։ Օրինակ, եթե արևը պատկերացնենք դդումի տեսքով, ապա Երկրագունդը դրա կողքը փոքրիկ սիսեռահատիկ է։
Արեգակի տրամագիծը մոտավորապես 1391016կմ է։ Արեգակի տրամագծի վրա կարելի է տեղավորել 109 Երկիր մոլորակ։
Արեգակի ամենատաք հատվածը գտնվում է նրա կենտրոնում՝ կորիզում։ Այնտեղ ջերմաստիճանը գերազանցում է 15 միլիոն աստիճանը։ Կորիզին հաջորդում է ճառագայթային հատվածը։ Այն կորիզից էներգիան տարածում է ամբողջ արևի վրա։ Արեգակի վերին շերտը մթնոլորտն է, որտեղ ջերմաստիճանը «ընդամենը» 5-6 հազար աստիճան է։
Արեգակի վրա սև կետեր կան։ Դրանք այն հատվածներն են, որտեղ արևի վերին շերտի ջերմաստիճանը 1-2 հազար աստիճանով ցածր է արեգակի բուն ջերմաստիճանից։ Այնտեղ լույսն այնքան էլ պայծառ չէ, այդ պատճառով էլ նման հատվածները մեզ սև կետեր են թվում։
Արեգակից դեպի Երկիր մոլորակ լույսը հասնում է 8 րոպե 15 վայրկյանում։
