Թվատախտակով ժամացույցներից օգտվելը փոքրիկների համար բավական բարդ է։ Երեխան պետք է հաշվել իմանա, կարողանա հաշվել 5-ական համակարգով։ Փոքրիկ.am կայքն առաջարկում է այլընտրանքային լուծում ժամերը սովորելու համար։ Նախ անհրաժեշտ է պատրաստել ժամացույցը, որի պատրաստման քայլ առ քայլ նկարագրությունը բերված է ստորև։
Այս ժամացույցով ժամերը սովորելու համար անհրաժեշտ է, որպեսզի երեխան ճանաչի թվերը՝ մինչև 60-ը։ Կարմիր գույնով ներկված են րոպեների արժեքներն ու րոպեների մեծ սլաքը, իսկ կապույտով՝ ժամի արժեքներն ու ժամի փոքր սլաքը։ Մեծահասակը պետք է փոքրիկին բացատրի, ինչպե՞ս կարդալ ժամը։ Նախ կարդում ենք կապույտ սլաքի ցույց տված թիվը, ապա կարմիր սլաքի ցույց տված կարմիր թիվը։ Պետք է փոքրիկին բացատրել, որ թվատախտակի աջակողմյան հատվածում ժամը կարդալիս օգտագործվում է «անց» բառը, իսկ ձախակողմյան հատվածում՝ «պակաս» բառը։
Այսպես սովորելով կարդալ ժամը, հետագայում երեխան տեսողական հիշողությամբ արդեն կկարդա ցանկացած թվատախտակով ժամացույցի տվյալները։
Ժամացույցը պատրաստելու համար անհրաժեշտ են՝ տպիչ (գունավոր կամ սև-սպիտակ), հաստ ստվարաթուղթ, սոսինձ, մկրատ, գնդասեղ կամ մեխ և ներկեր։
Ներբեռնեք գունավոր կամ սև-սպիտակ ժամացույցի շաբլոնը, տպեք այն, կտրեք և սոսնձեք ստվարաթղթին։
Շաբլոնը տպելու համար ակտիվացրեք համապատասխան նկարը.
Շաբլոններ՝
Գունավոր ժամացույցի շաբլոն։
Սև-սպիտակ ժամացույցի շաբլոն.
Տպելուց հետո շաբլոնը կտրեք և ստվարաթղթի վրա սոսնձեք, ապա կենտրոնում փոքրիկ ծակ բացեք.
Ներկեք ժամը ցույց տվող թվերը մի գույն, իսկ րոպեները ցույց տվող թվերը՝ մեկ այլ գույն.
Այժմ նման ձևով պատրաստեք սլաքները, և դրանք ներկեք համապատասխանաբար մեծ սլաքը րոպեների թվերի գույնով, իսկ փոքր սլաքը՝ ժամերի թվերի գույնով։ Սլաքների ծայրում ծակեր բացեք.
Այժմ գնդասեղը կամ մեխը անց կացրեք սկզբում փոքր սլաքի միջով, ապա մեծ սլաքի միջով և վերջում՝ թվատախտակի անցքի միջով։ Այդպիսով սլաքները կլինեն շարժվող։
Գունավոր ժամացույցի համար անհրաժեշտ է կատարել բոլոր գործողությունները՝ բացի ներկելուց։
