Ինչո՞ւ է ձյունը սպիտակ: Գիտե՞ս, որ ձյունն իրականում սառած ջուր է։ Բայց եթե սառույցը թափանցիկ է, ապա ինչո՞ւ է ձյունը սպիտակ երևում։ Պատճառն այն է, որ փաթիլները կազմված են շատ փոքրիկ սառցե բյուրեղներից։ Երբ լույսն ընկնում է այդ բյուրեղների վրա ու հետ «ցատկում», մեր աչքերին ձյունը սպիտակ է երևում։
Ինչպե՞ս է ծնվում փաթիլը: Ձյունը առաջանում է երկնքում՝ ջրային գոլորշուց (դա այն «ծուխին» է նման, որ դուրս է գալիս թեյնիկից)։ Սկզբում օդում հայտնվում են շատ փոքրիկ, թափանցիկ բյուրեղներ։ Նրանք պարում են օդում ու կպչում իրար։ Երբ արդեն հարյուրավոր այդպիսի փոքրիկներ միանում են, դառնում են մեծ փաթիլ ու կամացուկ իջնում են գետնին։
Վեցանկյուն հրաշքներ: Դու գիտե՞ս, որ բոլոր փաթիլները տարբեր են։ Բայց նրանք բոլորն ունեն մի ընդհանուր բան՝ 6 կողմ կամ 6 ճառագայթ։ Որքան էլ փնտրես, աշխարհում չես գտնի երկու լրիվ նույնանման նախշերով փաթիլ։ Նրանք բոլորը յուրահատուկ են։
Գունավոր ձյուն: Պատկերացնում ե՞ս, ձյունը միշտ չէ, որ սպիտակ է լինում։ Աշխարհի որոշ տեղերում մարդիկ տեսել են կարմիր, կանաչ, կապույտ և նույնիսկ սև ձյուն։ Դա լինում է այն պատճառով, որ օդում կան շատ մանր փոշիներ կամ բույսերի մասնիկներ, որոնք «ներկում» են ձյունը, երբ այն իջնում է երկնքից։
Ձյունե «վերմակ»: Իրականում ձյունը շատ լավ պահում է ջերմությունը։ Փաթիլների արանքում շատ օդ կա, այդ պատճառով ձյան շերտը նմանվում է տաք վերմակի։ Այն պաշտպանում է բույսերի արմատները ցրտից, որպեսզի նրանք չմրսեն ձմռանը։ Նույնիսկ հյուսիսում ապրող էսկիմոսները ձյունից տնակներ են սարքում, որոնց մեջ շատ տաք է լինում։
