Այն տունը, որտեղ երեխա կա, խաղալիքների պակաս չկա։ Որպեսզի կարգուկանոն պահպանելը հեշտ լինի, պետք է խաղալիքների թագավորությունում որոշակի օրենքներ լինեն։
Շատ ընտանիքներում խաղալիքները պահվում են մանկական մահճակալի տակ մեծ արկղի մեջ։ Դա այնքան էլ լավ միջոց չի։ Նման արկղի մեջ սովորաբար խառնաշփոթ է տիրում։ Անհրաժեշտ խաղալիք գտնելը դժվար է։ Եվ, բացի այդ, պահպանման նման ձևից խաղալիքների մեծ մասը կարող է վնասվել։
Կան բազմաթիվ այլ հետաքրքիր ու յուրահատուկ պահպանման միջոցներ։
Շատ հարմար է խաղալիքները դասավորել դարակներով պահարանի մեջ։ Ներքևի դարակներում տեղավորեք ավտոմեքենաներն ու այլ խոշոր 
խաղալիքները։ Մանր խաղալիքները կարելի է լցնել տարբեր արկղիկների մեջ ու դասավորել միմյանց վրա։ Յուրաքանչյուր տուփի վրա ամրացրեք պարունակությունը արտահայտող որևէ նկար կամ գրություն, եթե երեխան կարդալ գիտի։
Եթե խաղալիքները շատ են, իսկ երեխան փոքրիկ ու խաղում է սահմանափակ խաղալիքներով, ապա դրանք դասավորեք յոթ միանման արկղների մեջ և դրանցից յուրաքանչյուրի վրա գրեք շաբաթվա օրերը։ Այդ դեպքում հարկ կլինի հավաքել ավելի քիչ քանակությամբ խաղալիքներ, իսկ երեխան յուրաքանչյուր օր կխաղա մի խումբ խաղալիքով։
Յուրաքանչյուր փափուկ խաղալիքի ականջին կարելի է ժապավենից փոքրիկ հանգույց կարել, իսկ մանկասենյակի պատերից մեկին ամրացնել փոքր կախիչներ։ Պատերից կախված փափուկ խաղալիքները գեղեցիկ տեսք են հաղորդում սենյակին, ինչպես նաև այսպես բավականին տեղ է 
ազատվում հատակին կամ դարակների մեջ։ Կախիչների մի մասը կարելի է համեմատաբար ներքևում ամրացնել, որպեսզի երեխան ինքը կարողանա վերցնել, իսկ խաղալուց հետո կախել խաղալիքները։ Վերևի կախիչների վրա կախեք այն խաղալիքները, որոնք երեխայի համար տվյալ պահին հետաքրքրություն չեն ներկայացնում։
Մանկական բարակ գրքերը հարմար է պահել ափսեների համար նախատեսված պլաստմասե չորանոցի վրա։ Երեխայի համար հարմարավոտ կլինի գտնել իր ցանկացած գիրքը։
