Երբ դրսում մռայլ է ու անձրև, իսկ երեխան ձանձրանում է տանը, ապա կարելի է հետաքրքիր ու օգտակար կազմակերպել երեխայի ժամանցը տան պայմաններում։
«Բասկետբոլ տանը»
Հասկանալի է, որ տանը, օրինակ, բասկետբոլ խաղալիս պատուհաններն ու նուրբ իրերը կոտրվելու վտանգի են ենթարկվում։ Սակայն, բասկետբոլ կարելի է խաղալ պենոպլաստե գնդակով, կամ ճմրթած ու գունդ սարքած թղթերով։ Որպես բասկետբոլի զամբյուղ կարելի է օգտագործել ցանկացած արկղ կամ զաբյուղ։ Զամբյուղը տեղադրում ենք որևէ դարակի կամ հատակի վրա և երեխաներին առաջարկում տարբեր հեռավորություններից «գնդակը» նետել զամբյուղի մեջ։
«Վարժեցնում ենք ընտանի կենդանիներ»
Եթե տանն ունեք ընտանի կենդանիներ, ապա կարելի է նրանց նոր հնարքներ սովորեցնել։ Այս զբաղմունքը ոչ միայն հետաքրքիր կդարձնի անձրևոտ օրը, այլ նաև երեխայի մոտ կզարգացնի պատասխանատվության զգացումը։
«Խաղում ենք փուչիկներով»
Կարելի է փուչիկներ փչել և խաղալ վոլեյբոլ կամ թղթից հովհարներ պատրաստելով, խաղալ սեղանի թենիս։
«Գանձեր որոնելիս»
Այս խաղը պետք է նախապատրաստել։ Երեխաները այն հաճույքով կխաղան թե անձրևային, թե պայծառ օրերին։ Անհրաժեշտ է պատրաստել նվերը և նախօրոք հուշումներ տեղադրել ամբողջ տանը։ Հուշումները պետք է լինեն այնպիսին, որ հետաքրքիր լինի դրանք գուշակելը։ Փոքրիկների համար ցանկալի է որպես հուշում օգտագործել նկարները, իսկ համեմատաբար մեծերի համար՝ ռեբուսներ ու հանելուկներ։ Երբ հուշումները պատրաստ լինեն, իսկ նվերը՝ պահված, երեխաները պետք է հուշումների օգնությամբ գտնեն այն։
«Նկարչություն պատի վրա»
Պատի վրա ամրացնում ենք մեծ թղթի կտոր։ Փորձում ենք վրան նկարել մատիտներով, վրձիներով, ներկերով լի բալոններով։ Այս զբաղմունքը ոչ միայն հետաքրքիր ժամանց կապահովի, այլ նաև կզարգացնի երեխայի երևակայությունը։
Տեսադասեր»
Մռայլ եղանակին բավականին հետաքրքիր և ուրախ զբաղմունք է որևէ տեսադասի հետևելը, օրինակ՝ լատինամերիկյան պարերի տեսադասին։ Պարզապես անհրաժեշտ է միացնել տեսադասը, հետևել մարզիչին և կրկնել շարժումները։
«Ի՞նչ է կորել»
Սեղանի վրա տեղադրեք մի քանի իր։ Երեխային խնդրեք սենյակից դուրս գա և պահեք իրերից մեկը։ Երեխան պետք է գուշակի, թե որ իրն է կորել և փորձի գտնել այն։ Կարող եք նրան հուշել «տաք է», «սառն է» հուշումներով։
«Եկեք թրջվենք»
Իսկ ինչո՞ւ անձրևին մնալ տանը։ Կարելի է հագնել ռեզինե կոշիկներ, տաք գուլպաներ և հագուստ, անձրևային թիկնոցներ ու վերցնելով անձրևանոցները զբոսնել անձրևի տակ, երգեր երգել, թռչկոտել ջրափոսերում։
