Երկրորդ երեխայի ծնունդն ընտանիքում բավականին մեծ երջանկություն է, սակայն, միևնույն ժամանակ, ծնողների մոտ ի հայտ է գալիս վախ, անհանգստություն, տագնապ. «իսկ եթե հանկարծ չկարողանամ երկու երեխաներին միաժամանակ պահել», «իսկ եթե հանկարծ աշխատանքի ընդունվեմ ու չհասցնեմ փոքրիկին կերակրել». սիրելի ծնողներ եկեք չմոռանանք Ձեր մյուս հրաշք փոքրիկի մասին, ով մի կողմ քաշված իր ապրումներն ու «իսկ եթե հանկարծ»-ներն ունի:
Եթե երեխան 5-7 տարեկան է, անհրաժեշտ է պատմել, թե իրականում նորածնին որտեղից են տուն բերելու, պետք չէ խաբել կամ պատմություններ ու
լեգենդներ հյուսել:
«Ի՞նչ կլինի մայրիկիս հետ, երբ փորիկից երեխան ծնվի»: Այս հարցը երեխաները հաճախ ամաչում են տալ, սակայն չպետք է մոռանալ, որ շատ կարևոր է այս անհանգստացնող հարցին պատասխանելը:
Խանդ կարող է դրսևորվել նույնիսկ այն դեպքում, երբ ձեր փոքրիկն անհամբերությամբ է սպասել քույրիկի կամ եղբոր ծննդին, որի արդյունքում երեխան կարող է դառնալ մեկուսացված, իրեն լքված համարել, դառնալ ագրեսիվ, կամակոր: Այս ամենն էլ իր հերթին մեծ սթրես է մոր համար, քանի որ նա ուզում է, որ ամեն ինչ լինի իդեալական՝ և՛ երեխաները խնդիր չունենան, և՛ տնային տնտնեսությունում ամեն ինչ գերազանց լինի. ինչպե՞ս այս ամենը հասցել:
Նախապատրաստական աշխատանքները սկսեք մինչ երեխայի 
ծնվելը: Փոքրիկին ցույց տվեք նորածնային տարիքի լուսանկարները, բացատրեք, որ երբ երեխան ծնվի, չի կարող միանգամից իր հետ խաղալ, դեռ նա պետք է իրեն օգնի փոքրիկին խնամելու հարցերում: Թույլ տվեք երեխան ինքը ընտրի եղբոր հագուստը, կոշիկները: Միասին կահավորեք նորածնի ննջասենյակը: Թույլ տվեք երեխան դիպչի Ձեր փորիկին, զրուցի իր ապագա ընկերոջ հետ, նման ձևով նրանց մոտ շփումն ավելի վաղ կձևավորվի:
Եվ կտեսնեք, թե որքան համերաշխ փոքրիկներ կունենաք:
Պատրաստեց՝ Անի Գարամյանը (197 դպրոցի և «Այբ Բեն Գիմ» զարգացման ակումբի սոցիալական մանկավարժ)
