Խանութներում, փողոցներում, մետրոյում կամ կայարաններում միշտ շատ մարդ կա։ Բոլորը շարժվում են տարբեր ուղղություններով, շտապում են, հրում միմյանց։ Մարդկանց հոսքը նման է վտանգավոր շրջադարձեր ունեցող վարար գետի։
Ամբոխի մեջ կորելը հեշտ է։
Հորանջեցիր, կամ կողքերդ նայեցիր – ամբոխը քեզ կհեռացնի հայրիկից կամ մայրիկից։ Շուրջը բոլորը այնքան բարձրահասակ են, որ նրանց պատճառով ոչինչ չի երևում։ Ամբոխի աղմուկը շատ բարձր է, նույնիսկ եթե բղավես, ծնողներդ չեն լսի ձայնդ։ Բացի այդ, հեշտ է կորել այնտեղ, որտեղ դժվար է իրար տեսնել. օրինակ՝ բարձր ցուցափեղկերով խանութներում, կամ խիտ թփերով ու ծառերով այգում։
Սարսափելի է, չէ՞։
Շատ երեխաներ վախից վազում են, ուր աչքները կտրի, հույս ունենալով հասնել ծնողներին։
Իսկ թե ո՞ւր վազել, չգիտեն։
Եվ հնարավոր է, որ վազում են հակառակ կողմ։ Մայրիկը սկսում է փնտրել երեխային։ Նա լսում է, որ փոքրիկը լացում է, գնում է նրա մոտ, իսկ երեխան վազում է մյուս ուղղությամբ՝ ավելի հեռանալով ու սխալ
հույսով, որ կգտնի մայրիկին։
Որոշ երեխաներ վախից կծկվում են մի անկյունում ու լուռ լացում։ Դա ևս սխալ է։ Ծնողդ կփնտրի քեզ, բայց աղմուկի ու շատ մարդկանց պատճառով չի գտնի քեզ։ Այդպես շատ երկար ժամանակ չես գտնվի, ինչքան էլ մոտիկ լինեն ծնողներդ։
Իսկ ի՞նչ անել, եթե կորել ես։
Չխառնվել իրար ու օգնություն խնդրել
Հիշի՛ր. ծնողներդ մոտակայքում են, նրանք քեզ փնտրում են, առանց քեզ գտնելու նրանք չեն հեռանա ու նրանք քեզ անպայման կգտնեն։
Օգնի՛ր նրանց։
- Եթե դու նոր ես կորել, կանգնիր տեղում ու մի շարժվիր։
Ծնողներդ առաջին հերթին վերադառնալու են քեզ փնտրելու հենց այնտեղ, որտեղ տեսել են քեզ վերջին անգամ։ Եթե շուրջդ մարդիկ շատ են ու հրում են անընդհատ, փորձիր դուրս գալ ամբոխի միջից բաց տարածք կամ, եթե կողքդ աթոռ կա, բարձրանալ ու կանգնել աթոռի վրա, որպեսզի տեսանելի լինես։
- Մի՛ լացիր, այլ բարձր ձայնով կանչիր. «Մամա՜, մայրի՜կ, ես այստեղ եմ»։
Բոլոր երեխաների միանման են լցում, բայց յուրաքանչյուր երեխայի ձայնը տարբեր է ու ծնողդ ավելի հեշտ կգտնի քեզ քո ձայնի օգնությամբ։ - Եթե քեզ շուտ չեն գտնում, օգնություն խնդրիր մեծահասակներից։
Իսկ ումի՞ց օգնություն խնդրել։
Առաջին հերթին փորձիր գտնել համազգեստով որևէ մարդու։ Խանութում դա կլինի վաճառողը, մետրոյում՝ կայարանի հերթապահը, փողոցում՝ ոստիկանը։
Եթե ոչ մի նման մարդու չես տեսնում, մոտեցիր որևէ կնոջ, ով, ըստ քեզ, վստահելի կլինի։ Ասա նրան քո անունը և որ դու կորել ես։
Այդ դեպքում մեծահասակները բարձրաձայն կգոռան կամ բարձրախոսով կհայտարարեն՝ «կորել Արան, նա կանգնած է վաճառասեղանի մոտ ու սպասում է մայրիկին»։
Մայրիկը կլսի ու արագ կմոտենա։
- Փորձիր մտապահել մայրիկի հեռախոսահամարը և հեռախոս ունեցող մեծահասակներին խնդրի, որպեսզի զանգի մայրիկին և ասի, թե որտեղ ես դու։
Բացի այդ, կարելի է ծնողների հետ նախապես պայմանավորվել. եթե իրարից բաժանվենք, ապա կհանդիպենք հեռվից երևացող այն բարձր նկարի մոտ։
Այդպես դուք հեշտությամբ կգտնեք իրար։
