Անվտանգ երթևեկություն երեխաների հետ

Երեխաները հաճախ են ճամփորդում ավտոմեքենաներով։ Այս հոդվածը ճանապարհն անվտանգ և հետաքրքիր դարձնելու մասին է։

1. Ընտրեք ճիշտ նստատեղ

Հայաստանի Հանրապետության ճանապարհային երթևեկության կանոններում ասվում է՝ մինչև 12 տարեկան երեխաները պետք է երթևեկեն մանկական նստատեղերի մեջ նստած։ Չի կարելի երեխային տեղափոխել գրկած կամ պարզապես կողքը նստած վիճակում։ Մինչև 12 տարեկան երեխաներին չի թույլատրվում նստել առջևը՝ վարորդի կողքը, նույնիսկ մանկական նստատեղի մեջ նստած։

Մանկական նստատեղ ընտրելիս անհրաժեշտ է ուսումնասիրել նստատեղի համապատասխանությունը փոքրիկի քաշին, հասակին, տարիքին և, ինչը ևս շատ կարևոր է, տարածաշրջանի երթևեկության խտությունը։ Պետք է նաև ուշադրություն դարձնել նրան, որ մանկական նստատեղը համապատասխան լինի ավտոմեքենային՝ սկսած չափերից, մինչև նստատեղի ամրացման համակարգը։ Նստատեղերը կարող են պարզապես տեղադրվել ավտոմեքենայի մեջ և ամրացվել ավտոմեքենայի ամրագոտու միջոցով, ինչպես նաև կարող են ունենալ սեփական isofix համակարգ, որը մանկական նստատեղը ոտիկների օգնությամբ ամուր ամրացնում է ավտոմեքենայի նստարանին։ Այս տարբերակն ավելի ապահով է։ Ցավոք, ոչ բոլոր ավտոմեքենաներն ունեն isofix համակարգի հնարավորություն։ Դա ստուգելու համար պարզապես կարդացեք ավտոմեքենայի շահագործման գիրքը կամ ավտոմեքենայի նստարանների վրա փնտրեք isofix պիտակը։

Հիշե՛ք, կարևոր չէ, թե ինչ հեռավորություն պետք է անցնի երեխան ավտոմեքենայում։ Նա մի՛շտ պետք է նստի մանկական նստատեղում և ոչ թե ծնողի գիրկը կամ ծնողի կողքը։

Արտադրողները նախագծել են տարբեր նստատեղեր՝ կապված տարիքային առանձնահատկությունների հետ։

1. Խումբ 0-ն նախատեսված է մինչև 10կգ նորածին երեխաների համար (0-ից 9 ամսական երեխաներ)։ Այս նստատեղերը նախատեսված են այն նորածինների համար, որոնք հատուկ ցուցում ունեն միշտ պառկած դիրքում մնալու։

2. Խումբ 0+ -ը մինչև 13կգ նորածինների համար նախատեսված զամբյուղներ են 0-12 ամսական երեխաների համար, որոնց զանգվածը չի գերազանցում 13կգ-ն։ Սրանք ունեն կարգավորվող գոտիներ և բարձեր։ Ավտոմեքենայի մեջ ամրացվում են երթևեկության ուղղությանը հակառակ դիրքով։
Եթե, այնուամենայնիվ, որոշել եք զամբյուղը տեղադրել առջևի նստատեղին, ապա շատ կարևոր է, որ առջևի ուղևորի համար նախատեսված անվտանգության բարձիկը անջատվի, քանի որ վթարի դեպքում դրա ուժեղ հարվածը կարող է վնասել երեխային։

3. Խումբ 1. Այս նստատեղերը նախատեսված են 9-18 կգ երեխաների համար՝ 9 ամսականից մինչև 4 տարեկան։ Սրանք ունեն սեփական գոտիները։ Այս խմբի նստատեղերը կարող են ավտոմեքենայի մեջ ամրացվել ինչպես երթևեկության ուղղությամբ, այնպես էլ՝ հակառակ ուղղությամբ։

4. Խումբ 2. Այս խմբի մանկական նստատեղերը 4-ից 6 տարեկան երեխաների համար են, ովքեր ունեն 15-25կգ զանգված։ Սրանք ավտոմեքենայի մեջ տեղադրվում են դեմքով դեպի երթևեկության ուղղությունը։ Սեփական գոտիներ չունեն, ամրակապվում են ավտոմեքենայի ամրագոտիներով։

5. Խումբ 3. Այս խմբի նստատեղերը՝ բուսթերները նախատեսված են 6-11 տարեկան երեխաների համար (22-36կգ)։ Սրանք երեխաներին հնարավորություն են տալիս ավելի բարձր նստել և ամրակապվել ավտոմեքենայի ամրագոտիով։
Բուսթեր օգտագործելու դեպքում ուշադրություն դարձրեք, որ ավտոմեքենայի ամրագոտին երեխայի ուսի վրայով անցնի, այլապես վթարի ժամանակ ամրագոտու ձգվելու հետևանքով երեխան կարող է խեղդվել։

Օգտագործված մանկական նստատեղեր գնել խորհուրդ չի տրվում, քանի որ դուք չգիտեք դրանց կիրառման պատմությունը։ Եթե մանկական նստատեղով ավտոմեքենան վթարի է ենթարկվել, կամ մանկական նստատեղը շատ երկար է օգտագործվել, նրա արդյունավետությունը փոքրանում է։

2. Երեխաների հաստ վերնազգեստներով ամրակապումը սխալ է

Շատ կարևոր է, որ մինչև ամրակապելը երեխայի վրայից հանվի հաստ վերնազգեստը, որը կարող է ամրագոտին հեռացնել երեխայի մարմնից։ Եթե ամրագոտին հնարավորինս մոտ չէ երեխայի մարմնին, ամրագոտու արդյունավետությունն ընկնում է, և նա չի կարող երեխային ամուր պահել իր տեղում։ Եթե ավտոմեքենայի մեջ ցուրտ է, կարող եք վերնազգեստով ծածկել երեխային՝ ամրակապելուց հետո։

3. Մի թողեք երեխային մեքենայի մեջ մենակ

Դժբախտ պատահարներից (օրինակ՝ ջերմային հարված) խուսափելու համար երեխային երբեք մենակ մի թողեք ավտոմեքենայի մեջ՝ նույնիսկ շատ կարճ կանգառի ժամանակ։ Ավտոմեքենայի սրահը շատ արագ կարող է տաքանալ ու հասնել շատ բարձր ջերմաստիճանի։

Եթե մեքենան չի շահագործվում, թույլ մի տվեք երեխաներին խաղալ դրա մեջ։ Փակեք մեքենայի դռները և բանալիները հեռու պահեք երեխաներից։

4. Օգտագործեք անվտանգության համակարգերը

Ավտոմեքենայի շահագործման գրքում փնտրեք գաղտնի փականները օգտագործելու սկզբունքները։ Դրանց կիրառումը կարող է կանխել երեխայի կողմից դռների կամ պատուհանների բացելը մեքենայի ընթացքի ժամանակ և թույլ չտալ, որ երեխան ընկնի մեքենայից դուրս կամ վնասի իր վերջույթները։

5. Խուսափեք երեխային ավտոմեքենայի մեջ սնունդ տալուց

Մասնագետները խորհուրդ են տալիս շարժման ժամանակ երեխաներին սնունդ չտալ։ Սննդից խեղդվելու դեպքում դժվար կլինի անմիջապես կանգնեցնել ավտոմեքենան և օգնել երեխային։ Բացի այդ, ընթացքի ժամանակ հնարավոր չի լինի հասկանալ, արդյո՞ք սնունդ է թռել երեխայի շնչափողը, թե ոչ, քանի որ օդի անբավարարության պատճառով երեխան չի կարող օգնություն կանչել։

6. Երեխայի կողքը իրեր մի տեղափոխեք

Կտրուկ արգելակման ժամանակ վնասվածքներից խուսափելու համար չամրացվող իրերը միշտ տեղափոխեք ավտոմեքենայի բեռնախցիկում։ Բացի այդ, ծանր իրեր չի կարելի դնել ավտոմեքենայի հետևի հատվածում գտնվող «դարակի» վրա։ Կտրուկ արգելակման ժամանակ այն կարող է տեղաշարժվել և վնասել ուղևորներին։

Եթե ճանապարհորդում եք ընտանի կենդանիների հետ, ապա պետք է նրանց տեղափոխել հատուկ տեղափոխման պայուսակներով, որոնք ամրացվում են ավտոմեքենային՝ ամրագոտիների միջոցով։

7. Ճամփորդելիս կարճ զրույցներ վարեք

Շատ կարևոր է, որ երեխաները հասկանան, որ ավտոմեքենայի մեջ իրենք պետք է իրենց հանգիստ պահեն, քանի որ նրանց բղավոցը կամ այլ գործողությունները կարող են շեղել վարորդին։ Այս պարագայում կարճ զրույցները կարող են շատ արդյունավետ լինել թե՛ ճանապարհին զբաղվելու տեսանկյունից, թե՛ ընթացքում երեխային հետևելու համար։

Քննարկեք շրջակայքը, պատմեք այն տեղերի մասին, ուր պատրաստվում եք գնալ, խաղացեք ուրախ խաղեր. սրանք կօգնեն հանգիստ ու հաճելի ճանապարհորդություն ունենալ։ Բացի այդ, սա կօգնի խուսափել սրտխառնոցից, որը կարող է առաջանալ սմարթֆոններով կամ պլանշետներով զբաղվելու դեպքում։