Խառը հանելուկներ. Մկրտիչ Կորյուն

***

Արծաթե սեղան,
Կոկ ու պսպղան,
Աղջիկն ու տղան
Վրան կսղան։
սահադաշտ

***
Գլուխն՝ երկաթից,
Մարմինը՝ փայտից։
մուրճ

***
Նա սանրում է, սանր չի,
Մեծ է, սակայն ծանր չի,
Աշխատում է նա հանդում,
Հին ընկերն է գերանդու։
փոցխ

***
Ունի երկու կլոր թև,
Երկու բերան ունի նա,
Ով սիրում է կարուձև,
Նրան իսկույն կիմանա։
մկրատ

***
Շոր է կարում
Ողջ աշխարհքին,
Բայց շոր չունի
Նա իր հագին։
ասեղ

***
Ունի ատամ, չունի բերան,
Կտրատում է ծառ ու գերան։
սղոց

***
Սար ու ձորին
Ձայն է տալիս,
Դատարկ փորով
Տուն է գալիս։
թմբուկ

***
Արագ-արագ պտույտ անում,
Նուրբ ու բարակ թել է մանում։
իլիկ

***
Ի՞նչ քույրեր են հարազատ,
Որ շարում են թելից պատ։
գործելու շյուղեր

***
Նա պետք է գալիս
Աշխարհին ամբողջ,
Ունի զույգ գլուխ
Եվ մի փայտե պոչ։
քլունգ

***
Կա մի հսկա մեքենա,
Գործն արագ է անում նա,
Հասկը հնձում ու ծեծում,
Մեքենայի մեջ լցնում։
կոմբայն

***
Որքան շատ է բանում հողում,
Այնքան պայծառ է շողշողում։
խոփ

***
Փոքրիկ երկնքից
Ձյուն տեղաց անչափ,
Փայտե ձորակը
Լցրեց ափեափ։
ալրամաղ, ալյուր, տաշտ
***
Ինքը չի ուտում,
Ինքը չի խմում,
Բայց իր տիրոջը,
Միշտ կուշտ է պահում։
արհեստ

***
Ունեմ երկու փայտե ձի,
Առանց պայտի ու սանձի,-
Այնտեղ են ինձ ման ածում,
Ուր նստել է առատ ձյուն։
դահուկներ

***
Մարդիկ որտե՞ղ են բարձր խոսում,
Բայց դժվար են իրար լսում,
Թե ներս մտնեն սև շոր հագած,
Դուրս պիտի գան սպիտակած,
Եվ մարդաշատ այդ տնակում
Միայն մի մարդ է բնակվում։
ջրաղաց

***
Թեև կարգ-կանոն շատ է սիրում նա,
Բայց զբոսնում է սեղանի վրա,
Սաստիկ տաքացած գնում է, գալիս,
Մեր սգեստներին սիրուն տեսք տալիս։
արդուկ

***
Ունի հազար դուռ,
Հազար պատուհան,
Ձուկն ընկավ մեջը,
Ելք չկա նրան։
ուռկան

***
Որքան աշխատի,
Մարդ կտաքանա,-
Բայց աշխատելիս
Միշտ սառչում է նա։
սառնարան

***
Պապը՝ քարից,
Թոռն՝ երկաթից։
կացին

***
Գտեք դուք մի տակառիկ,
Եռման ջրով մեջը լիք,
Բարեկամն է մաքրության,
Մայրիկներին օգնական։
լվացքի մեքենա

***
Մի մատի գլխարկ,
Դեղին կամ ճերմակ,
Ընկեր են նրան
Թել, ասեղ, դերձակ։
մատնոց

***
Ի՞նչն է վազում անդադար,
Հնեց որ կանգնեց, կընկնի վայր։
հեծանիվ

***
Պոչը՝ ափում,
Քիթը՝ տափում,
Հող ու քար է
Քանդում, թափում։
բահ

***
Չունի ոչ բերան
Եվ ոչ էլ ատամ,
Կարող է կծել
Եվ խոփ և գութան։
ժանգ

***
Ի՞նչն է պար գալիս՝
Հնեված իր քթին,
Պարն ավարտելիս՝
Ընկնում է գետին։
հոլ

***
Ո՞վ ձեռքն առավ հող ու կավ
Մեզ պարգևեց կուժ ու գավ։
բրուտ

***
Ուրագի, սղոցի կողքին է ապրում
Եվ իր ողջ կյանքում տախտակ է սափրում։
ռանդա

***
Ամռանը՝ հանդում,
Ձմռանը՝ բանտում։
գյուղատնտեսական գործիքներ

***
Չի սիրում ոչ կեղտ
Եվ ոչ էլ փոշի,
Մաքրում է հատակ,
Հագուստ ու կոշիկ։
խոզանակ

***
Դարբինն ընկեր է նրան,
Ունի կոկորդ ու բերան,
Եվ փչում է քամու պես
Ու բորբոքում է քուրան։
փուքս

***
Ո՞ր դաշտավայրում
Մարտեր են վարում,
Բախվում են ձիեր,
Ընկնում են դիեր,
Սակայն չի թափվում
Մի կաթիլ արյուն։
շախմատ

***
Ոչ թուխպ է, ոչ ամպ,
Բայց քո ցանկությամբ,
Քո ուզած տեղում
Անձրև է մաղում։
ցնցուղ

***
Այն ի՞նչն է, այն ինչ,
Երբ տանես հնձի,
Վայր դնես՝ քնի,
Բռնես՝ արածի։
մանգաղ

***
Ի՞նչ երկու եղբայր
Ընկած ճանապարհ,
Վազում են, վազում,
Չեն հասնում իրար։
հեծանվի անիվները

***
Մեքենա է, բայց և մայր,
Զավակներն են անհամար։
ինկուբատոր

***
Ոչ հազար հատ, այլ մեկ է նա,
Բայց որ կանգնեց ճամփի վրա,
Էլ չեն կարող տեղից շարժվել
Ոչ մարդ, ոչ սայլ, ոչ մեքենա։
ուղեփակոց

***
Ունի մի ակ,
Երկու հենակ,
Անվանում ենք …
ձեռնասայլակ

***
Քամու ուժով շարժվող թև,
Արագաշարժ ու թեթև,
Ցորենն այլուր է անում,
Ջրհորից ջուր է հանում։
հողմաշարժիչ

***
Ընկերացավ ջրի հետ,
Մարեց տարավ աղտ ու կեղտ։
օճառ